Azərbaycan, Bakı, 04 dekabr/ Trend , müxbir E.İsmayılov/ Azərbaycan, Rusiya və İranın işçi qrupları dekabrın sonunda "Şimal-Cənub" dəmir yolu layihəsinin texniki - iqtisadi əsaslandırmasını müzakirə edəcəklər, - Azərbaycan Dövlət Dəmir Yolu İdarəsi mətbuat xidmətinin rəhbəri Nadir Əzməmmədov cümə axşamı bildirib.
"Hazırda görüşün keçirilməsi üzrə danışıqlar gedir. Onun dekabrın sonunda Moskva və ya Sankt-Peterburqda keçiriləcəyi planlaşdırılır", - Əzməmmədov əlavə edib.
"Şimal-Cənub" nəqliyyat dəhlizi layihəsi Rusiya, Azəbaycan, İran vasitəsilə Avropadan Hindistan və Cənub-Şərqi Asiya ölkələrinə vahid dəmir yolu əlaqəsinin yaradılmasını nəzərdə tutur. Layihənin reallaşdırılmasına ilkin qiymətləndirmələrə görə 400 mln. dollardan çox vəsait tələb olunur. İşlərin çox hissəsini Azərbaycan sərhədinədək dəmir yolu əlaqəsi olmayan İranda aparmaq lazım olacaq. Azərbaycanda təxminən 35 - 40 mln. dollar məbləğində müyyən işlər görmək lazımdır.
Azərbaycanda həyata keçiriləcək işlər Astara stansiyasınadək (AR) 8,5 km - lik dəmir yolunun çəkilməsini, təkər cütlüklərinin dəyişdirilməsi sistemlərinə malik stansiyanın tikintisini, sərhəd və gömrük infrastrukturunun yaradılmasını nəzərdə tutur. Sərhədyanı dəmir yolu körpüsü salmaq lazımdır. Bu layihənin realizəsi İranla paritet əsasda həyata keçiriləcək.
Bu dəhlizdə yük daşınmalarının birinci mərhələdə ildə 5 mln. ton olacağı, gələcəkdə 10-15 mln. tonadək artırılacağı proqnozlaşdırılır.
Müəlliflə əlaqə saxlamaq üçün elektron ünvan: [email protected]