Azərbaycan, Bakı, 22 dekabr/ Trend / "Azərdəmiryolbank" ASC Avropa Yenidənqurma və İnkişaf Bankının (AYIB) revolver fondundan 3,35 mln. dollar məbləğində qısamüddətli maliyyələşdirmə açıb, - bankın bazar ertəsi yayılan məlumatında deyilir. Beləliklə, ötən il 16 mln. dollaradək artırılmış AYİB-in kredit xətti, demək olar ki, tam mənimsənilib.
Azərdəmiryolbank tərəfindən dəstəklənən 2 mln. və 1,35 mln. dollar dəyərində yeni layihələr Asiya və Avropadan ticarət və sənaye avadanlığının alınmasını nəzərdə tutur.
"Bank gələcəkdə də xarici ticarət əməliyyatlarının maliyyələşdirilməsi ilə bağlı iş adamlarına lazımi köməyi göstərmək niyyətindədir", - bankın İdarə Heyətinin sədri Yusif Cabbarov bildirib.
Azərdəmiryolbank-ın AYİB ilə əməkdaşlığının əsası 1999-cu ildə qoyulub. Müxtəlif proqlamlar çərçivəsində, indiyədək tərəflər arasında mikro, kiçik və orta sahibkarlığın kreditləşdirilməsini nəzərdə tutan ümumi həcmi 42,5 mln. dollar olan sazişlər bağlanılıb. 2005 - ci ildən AYİB bankın 25 % +1 səhmini alaraq, onun səhmdarı olub.
Azərbaycanın ilk kommersiya bankı olan "Azərdəmiryolbank" ASC 1989 - cu ildə təsis edilib. Bakı və regionlarda Bankın 30 filial və şöbəsi fəaliyyət göstərir.
Müəlliflə əlaqə saxlamaq üçün elektron ünvan: [email protected]