Azərbaycan, Bakı, 26 yanvar/ Trend , müxbir Ü.İsmayılova/
Bakının mərkəzində Qış bulvari tikiləcək, - Azərbaycanın Dövlət Memarlıq və Şəhərsalma Komitəsinin Beynəlxalq münasibətlər və informasiya şöbəsinin rəhbəri Cahangir Qocayev bazar ertəsi bildirib.
Hələ 1985-ci ildə təsdiqlənmiş köhnə Baş plana əsasən, yeni bulvarın Bakının dəmir yolu vağzalından Azərbaycan Milli Akademik Dram Teatrınadək tikilməsi nəzərdə tutulur.
"Qış bulvarı" ideyası "küləkdən gizlənməkdən" ibarətdir. Bakı küləklər şəhəridir. Dənizkənarı bulvarda ilin soyuq vaxtlarında vaxt keçirmək rahat deyil. Şəhərin bu hissəsində isə [yeni bulvarın tikiləcəyi yerdə] demək olar ki, külək olmur", - Qocayev deyib.
Komitə artıq bulvarın tikintisinə hazırlıq elan edib. Memarlar tərəfindən layihələrin təqdim edilməsi gözlənilir.
Qocayevin sözlərinə görə, hələlik komitəyə layihə təklifləri daxil olmayıb.
O, tikintinin müddəti, eləcə də layihənin dəyəri barədə danışmağın tez olduğunu vurğulayıb.
"Düşünürəm ki, fors-major vəziyyət olmazsa, yaxın bir neçə ildə qış bulvarının tikintisi başlaya bilər", - Qocayev deyib.
Müəlliflə əlaqə saxlamaq üçün elektron ünvan: [email protected]