Azərbaycan, Bakı, 09 fevral / Trend müxbir N.İsmayılova/ 2009-cu ildə, ötən il olduğu kimi, Azərbaycanda məişət texnikasının alınması üçün verilən kredit əhali üçün əlçatan səviyyədədir. Məişət texnikası satışı üzərində ixtisaslaşan mağazalar kreditə mal verməkdə davam edir. Bu mağazaların əməkdaşlıq etdiyi banklar, borcların verilmə şərtlərini dəyişməz saxlayıb. Ancaq Azərbaycan bankları tərəfindən məişət texnikası alınması üçün verilən kreditlərin məbləği 1000-1500 manatı ötmür.
AZEL (Azerbaijan Electronikası) ticarət şəbəkəsindən deyilib ki, onların mağazaları iki bankla əməkdaşlıq edir - Bank of Baku və Rabita Bank. Hər bir bankın öz kreditvermə şərtləri var və müştəri onlardan özünə uyğun gələnini seçir. AZEL mağazasının filialından asılı olaraq kredit şərtləri də dəyişir. Bank of Baku-nun şərtlərinə əsasən, kredit üzrə ilkin ödəniş 10-20 faiz, illik isə - 17 faiz təşkil edir. Rabita Bank kreditləri üzrə ilkin ödəniş yoxdur, ancaq illik faiz dərəcəsi 21-ə bərabərdir. Hər iki bankın istiqrazvermə müddəti 18 ayı keçmir.
Unitech mağazasından məlumat verilib ki, şirkət Bank Standard-la əməkdaşlıq edir. Kreditlər 20-30 faiz arası ilkin ödənişlə verilir və bu rəqəm alıcının aylıq məvacibindən asılı olaraq dəyişir. Kedit üzrə illik dərəcəsi bir il müddətinə verilməsi şərtilə ildə 16 faiz təşkil edir. "Kreditlərin verilmə şərtlərinin dəyişdirilməsi yaxın perspektivdə nəzərdə tutulmur", - mağazadan bildirilib.
BAKOND mağazasından deyilib ki, onların malları Bank of Baku-nun kreditləri vasitəsilə satılır. Kredit alan zaman alıcı ilkin ödənişdən azad olunur. İllik faiz dərəcəsi 26 faiz olmaqla, maksimal kredit müddəti iki il müəyyən edilir. Verilən kreditin məbləği 1500 manatı keçməməlidir.
Baku Electronics mağazası Azerdemiryolbank-la əməkdaşlıq edir. Kreditlər ilkin 20 faizlik ödənişlə illik dərəcəsi 13 faiz olmaqla verilir. Kreditin qaytarılması üçün maksimal müddət 18 aydır.
Computer City-dən deyilib ki, kreditlər Rabita Bank vasitəsilə verilir. Kredit şərtləri aşağıdakılardır: ilkin ödənişsiz, 17 faiz illik, müddət bir il.
Fevralın 09-na olan rəsmi məzənnə 0,8077 AZN/USD təşkil edir.
Məqalə müəllifi ilə əlaqə ünvanı: [email protected]
