İran, Tehran, 09 fevral / Trend , müxbir A.Namdari/ İran parlamentinin nümayəndəsi bildirib ki, İran 2009-2010-cu illərdə ciddi büdcə kəsiri ilə üzləşəcək.
"İran 2009-2010-cu il büdcəsində ciddi kəsirlərlə üzləşəcək , hazırda büdcə layihəsi parlamentin müxtəlif komissiyaları tərəfindən araşdırılır", - deyə İran Parlamentinin büdcə və iqtisadi siyasət məsələləri komissiyasının üzvi Abbasəli Nura bazar ertəsi Trend -a bildirib.
Nura büdcə layihəsinin araşdırılmasının martın əvvəllərində tamamlanaraq parlamentdə qəbul edilməsi üçün müzakirəyə çıxarılacağını bildirib.
"Büdcə layihəsi Parlamentdə balanslaşdırılıcaq",-deyə Nura bildirib. O, bu haqda geniş açıqlama verməkdən imtina edib.
Əhmədinejad hökuməti büdcə layihəsini iki həftə öncə 2009-2010-cu illər üçün Parlamentə qəbul olunması üçün göndərib.
İran parlamentinin araşdırmalar mərkəzi fevralın 8-də elan edib ki, İranın 2009-2010-cu il (hicri təqvimi ilə 1388-ci il ) büdcəsində 44 min milyard tümən (t?xmin?n 42 milyard dollar) kəsir var. Hökumət bu məsələyə hələlik münasibət bildirməyib.
İranın yeni budcə layihəsinə əsasən, neftin qiyməti aşağı olduğu üçün 1388-ci ildə İranın ehtiyat valyuta fonduna valyuta köçürülməyəcək.
"Hökumət parlamentə təqdim etdiyi büdcə layihəsində, ehtiyat valyuta fondundan 12 milyard dollar vəsait götürməyi təklif edib", - İran parlamentinin digər nümayəndəsi Əhəm Təvəkküli bazar günü jurnalistlərə açıqlamasında bildirib.
İran prezidenti Mahmud Əhmədinejad yanvarın 27-də büdcə layihəsini Parlamentə təqdim etməzdən öncə bildirib ki, 2009-2010-cu il büdcə layihəsi dünyanın iqtisadi şəraitinə uyğun, bütöv və həyata keçirilməli bir büdcə layihəsidir. Neft İranın dövlət gəlirlərinin 80 faizini təşkil edir. İran rəsmiləri dəfələrlə dünya bazarlarında neft qiymətinin düşməsindən narahatlıqlarını bildiriblər.
Məqalə müəllifi ilə əlaqə ünvanı: [email protected]