Gürcüstan, Tbilisi, 04 mart / Trend , müxbir N.Kirtsxaliya / "Gürcüstanın Baş naziri Nikoloz Qilaurinin Brüsselə səfərinin məqsədlərindən biri donor konfransı tərəfindən ayrılan vəsaitlərdir", - çərşənbə günü maliyyə naziri Kaxa Bainduraşvili deyib.
Onun sözlərinə görə, səfər çərçivəsində Baş nazir ikitərəfli görüşlər keçirəcək. Orada Gürcüstan və Aİ ilə münasibətlərin dərinləşdirilməsi perspektivləri, əsasən də viza rejimi və ticarət münasibətlərinin inkişafı müzakirə ediləcək.
Səfərin gedişində, həmçinin Gürcüstana yardım göstərilməsi məsələləri nəzərdən keçiriləcək.
"Bu paketdə konkret vədlər var, amma onların yerinə yetirilməsi üçün müəyyən müqavilələr imzalanmalı və razılıqlar əldə olunmalıdır", - nazir bildirib.
Gürcüstanın donorları ötən ilin sonundakı xüsusi konfransda 4,5 milyard dollar ayırmaq qərarına gəlib. Tbilisi artıq bu məbləğin 1,7 milyard dollarını alıb. İlin sonuna qədər bu rəqəm iki milyarda çatdırılacaq.
Bütün donor yardımı proqramı üç ilə hesablanıb.
Məqalə müəllifi ilə əlaqə ünvanı: [email protected]