Azərbaycan, Bakı, 25 mart / Trend , müxbir Ü.İsmaylova /
Azərbaycanın mədəniyyət və turizm naziri Əbülfəs Qarayev "Maliyyə böhranının Avropa turizminə təsiri" mövzusunda çərşənbə günü Bakıda keçirilən texniki seminarda bildirib ki, Azərbaycan turizmi dünya maliyyə və iqtisadi böhranından kənarda qalmayacaq.
"Dünya maliyyə böhranı hazırda dərinləşir və bütün dünya üzrə turistlərin axını azalır", - nazir deyib.
Onun sözlərinə əsasən, 2008-ci ildə Azərbaycanın turizm sahəsində 40% artım qeydə alınıb.
"Bu il turist axınının 10% azalması gözlənilir. Bakı 2009-cu ildə turizmin paytaxtı elan olunduğundan beynəlxalq konfransların nəticəsində turistlərin sayının artması gözlənilir", - nazir qeyd edib.
Qarayevin sözlərinə görə, belə olduqda nazirlik daxili turizmi, ikitərəfli mübadiləni, biznes-turizmi və digər sahələri inkişaf etdirmək niyyətindədir.
Seminarla yanaşı, Bakıda Ümumdünya Turizm Təşkilatının (ÜTT) Avropa komissiyasının 49 iclası keçiriləcək. İclasın keçirilməsi haqqında qərar ÜTT-yə üzv ölkələrin ötən yığıncağında 2008-ci il 15-16 mart tarixində Çexiyada qəbul edilib. Azərbaycanla yanaşı, Bolqarıstanın da namizədliyi irəli sürülmüşdü.
ÜTT-nin baş katibi səlahiyyətlərini icra edən Talib Rifainin sözlərinə əsasən, bu ÜTT-nin Avropa komissiyasının Azərbaycanda ilk iclasıdır.
"Azərbaycan turizm dünyasında çox əhəmiyyətli oyunçudur, xüsusən də bizim təşkiat çərçivəsində. Azərbaycana ikitərəfli səfərimiz zamanı biz mövcud iqtisadi şəraitdə turizmin vəziyyətini müzakirə etdik. İclasın Azərbaycanda keçirilməsi ölkənin qədim uğurlu tarixə malik olması baxımından çox əhəmiyyətlidir və biz Azərbaycanla əməkdaşlıq etməkdə maraqlıyıq", - ÜTT baş katibi deyib.
İclasda Ümumdünya Turizm Təşkilatına üzv olan bütün ölkələrin nümayəndələri iştirak edir.
Məqalə müəllifi ilə əlaqə ünvanı: [email protected]