Azərbaycan, Bakı, 15 may / Trend , müxbir Ü.İsmayılova /
"Azərbaycan parlamentinin İqtisadi siyasət üzrə daimi komitəsi cümə axşamı "Qiymətləndirmə fəaliyyəti haqqında" qanuna əlavə və dəyişikliklər edilməsini müzakirə edib", rəsmi mətbuat məlumat verir.
"Bazar münasibətlərinin əsas atributlarından biri qiymət institutunun yaradılmasıdır", - iclasın gedişində komitənin rəhbəri Ziyad Səmədzadə deyib.
Azərbaycanda qiymətləndirmə fəaliyyəti 1998-ci ildə təsdiq edilmiş "Qiymətləndirmə fəaliyyəti haqqında" qanunla tənzimlənir. Bu bazarı qiymətləndirən beynəlxalq institutlar onu çox yüksək qiymətləndirirlər. Ancaq qanun artıq 11 ildir fəaliyyətdədir və ölkədə baş verən proseslər və yeni yaranan bazar münasibətləri ona yenidən baxılmanı labüd edir.
İclasın gedişində qeyd olunub ki, azad bazar iqtisadiyyatı şəraitində qiymətləndirmə fəaliyyətində dəyişikliklər ölkənin real sektorunun inkişafına kömək edəcək.
"Qiymətləndirmə fəaliyyəti haqqında" qanuna əlavə və dəyişikliklər Beynəlxalq Maliyyə Korporasiyasının (BMK) dəstəyi ilə Azərbaycan Qiymətləndiricilər Cəmiyyəti tərəfindən hazırlanıb.
Yeni özünüidarəetmə prinsipi, peşəkar təşkilat tərəfindən qiymətləndiricinin keyfiyyətinə nəzarət üzərində formalaşan "Qiymətləndirmə fəaliyyəti haqqında" qanunun yeni redaksiyasını BMK məsləhətçisi İqor Artemenkov hazırlayıb.
Qanunda qiymətləndiricilərin qiymətləndiricilər cəmiyyətində məcburi üzvlüyü nəzərdə tutulacaq ki, bu da onların bazara çıxışını təmin edəcək. Həmçinin qiymətləndiricinin fəaliyyətinin məcburi sığortalanması da dəyişikliklərdə yer alacaq. Bununla da, Artemenkovun fikrincə, peşəkar təşkilatın statusu yüksələcək. Bu funksiya Azərbaycan Qiymətləndiricilər Cəmiyyətinə təklif olunub.
Analoji mexanizm bir il əvvəl Rusiya qanunvericiliyində tətbiq olunub və bu sistem hazırda yetərincə səmərəli şəkildə fəaliyyət göstərir. Bütün bu mexanizmlər inkişaf etmiş bazarlarda fəaliyyət göstərir. Məsləhətçi hesab edir ki, qiymətləndiricilər özünüidarəetmə təşkilatlarından birində üzv olmağa məcburdurlar. İlkin mərhələdə Azərbaycanda üzvlərin ümumi sayı 100-200 həddində olubsa, Rusiyada bu struktur 300-ə çatıb.
Qiymətləndiricilik fəaliyyətinin inkişafı üzrə tədbirlər BMK-nın texniki yardımı layihəsinin ikinci mərhələsi çərçivəsində həyata keçirilir. Layihə İsveçrənin iqtisadi əlaqələr üzrə dövlət katibliyi (State Secretariat for Economic Affairs - SECO) ilə birgə maliyyələşdirilir. Bu layihə Mərkəzi Asiya və Azərbaycanı əhatə etsə də, SECO-nun vəsaitləri yalnız Azərbaycan üçün hesablanıb.
Azərbaycan Qiymətləndiricilər Cəmiyyəti 1997-ci ildə qeydiyyatdan keçib - bu ictimai təşkilat Azərbaycan ərazisində fəaliyyət göstərən bütün qiymətləndiriciləri özündə birləşdirir. Azərbaycan Qiymətləndiricilər Cəmiyyətinin 80 fiziki və 7 hüquqi şəxs qismində üzvü var.
Məqalə müəllifi ilə əlaqə ünvanı: [email protected]
