Azərbaycan, Bakı, 18 may / Trend , müxbir N.İsmayılova /
Mayın 1-nə Azərbaycanda rəsmi olaraq 44004 insan işsiz kimi qeydiyyata alınıb və onların 46,1%-i qadınlardır. Bu barədə Dövlət Statistika Komitəsindən bildiriblər. Yanvar-aprel ərzində Azərbaycanda işsizlərin sayı 1,1% azalıb. Ölkədə bir vakant yerə beş işsiz namizəddir.
Hesabat dövrü ərzində ölkənin işlə təmin olunmuş əhalisi 4 061 min nəfər təşkil edib. Bununla belə 1 383 min nəfər muzdla çalışır.
İstehsalatda muzdla işləyənlərin 12,6%-i sənaye, 4,8%-i tikinti, 2,7%-i kənd, meşə təsərrüfatı və balıqçılıq sahəsində işləyir. Xidmət sahəsində çalışanların 25,5%-i təhsil, 19,5%-i topdan və pərakəndə satış, avtomobil, məişət əşyaları və digər istifadə əşyalarının təmiri sahəsində, 10,1%-i səhiyyə və sosial xidmət sahələrində, 5%-i daşınmaz əmlak əməliyyatları sahəsində, 4,2%-i dövlət idarəçiliyi və müdafiə sahəsində və 2,5%-i digər sahələrdə işləyir.
Yanvar-mart ərzində iqtisadi fəaliyyətlə məşğul olan əcnəbilərin sayı 5 min nəfər təşkil edib ki, onlardan 1,4 min sənaye, 1,5 min tikinti, 0,6 min dəşınmaz əmlak əməliyyatları sektoru, 0,5 min ticarət, 0,4 min təhsil və 0,6 min digər sahələrdə işləyir.
İşsizliyə görə müavinət orta hesabla 148,6 manatdır.
Mayın 18-nə olan rəsmi məzənnə 0,8037 AZN/USD təşkil edir.
Məqalə müəllifi ilə əlaqə ünvanı: [email protected]
