Azərbaycan, Bakı, 09 iyun / Trend , müxbir İ.Xəlilova /
Azərbaycan İnvestisiya şirkəti (AİŞ) və Özəl Sektorun İnkişafı üzrə İslam Korporasiyası (İCD) tərəfindən təsis edilən Caspian International Investment Company şirkətinin (CIIC) Azərbaycanda fəaliyyətinin genişləndirilməsi üçün real imkanlar mövcuddur, bu barədə Azərbaycanın iqtisadi inkişaf naziri Şahin Mustafayev Aşqabadda İCD-nin prezidenti Əl Abudi ilə görüşdə bildirib.
Nazir Korporasiyanın Azərbaycanda həyata keçirdiyi layihələrdən razı qaldığını bildirib. O, Korporasiyanı aqronom fermaların, loqistik mərkəzlərin, anbarların yaradılması sahəsində qəbul olunmuş dövlət layihə proqramlarının maliyyələşdirilməsində iştirak etməyə dəvət edib.
"Korporasiya bu layihələri böyük maraqla nəzərdən keçirir və İCD informasiya texnologiyaları, maliyyə sektoru, həmçinin lizinq və sığorta sahəsindəki layihələrin həyata keçirilməsində iştirak etmək niyyətindədir", - deyə Abudi bildirib.
Caspian International Investment Company 2008-ci ilin mart ayında qapalı səhmdar şirkəti qismində 2,954 milyon manat məbləğində ilkin kapitalla qeydiyyatdan keçib. AİŞ-in hissə payı 25, ICD-nin isə 75 faiz təşkil edib.
CIIC-nın kapitalının 70 milyona çatdırılması nəticəsində investisiya şirkətinin hissə payı 20 faiz, İslam Korporasiyasının payı 10 faiz təşkil edəcək, digər səhmlər isə Fars körfəzi üzrə investorların payına düşəcək.
AİŞ öz hissə payı üçün ümumilikdə 14 milyon dollar ödəyəcək.
CIIC-in kapitalın artırılması üçün ötən il sentyabr ayının 23-də Qiymətli Kağızlar üzrə Dövlət Komitəsi hər bir səhminin qiyməti 850 manat olan 62040 səhm emissiyası planını qeydiyyatdan keçirib.
Ötən ilin iyun ayında Bakıda keçirilən investisiya konfransının yekunları nəticəsində potensial investorlar dairəsi müəyyən edilib. Hazırda şirkət layihələrin müəyyənləşdirilməsi və qiymətləndirilməsi məqsədilə yerli və xarici investorlar ilə, həmçinin dövlət sutrukturları ilə əməkdaşlıq edir.
CIIC-in investisiya strategiyasına əsasən, şəriət prinsiplərinə zidd olan spirtli içkilər və donuz əti məhsulları istehsal edən müəssisələr istisna olmaqla iqtisadiyyatın real sektorunda və həmçinin standart maliyyə xidmətləri və sığorta xidmətləri göstərilməsi sahəsində fəaliyyət göstərən bank və sığorta təşkilatlarında fəlaiyyət aparılacaq.
İyunun 9-na olan rəsmi məzənnə 0,8039 AZN/USD təşkil edir.
Məqalə müəllifi ilə əlaqə ünvanı: [email protected]
