Azərbaycan, Bakı, 16 iyun / Trend , müxbir N.İsmayılova /
Azərbaycanda korporativ qiymətli kağızların dövriyyəsi 2009-cu ilin yanvar-may aylarında 177,59 milyon manat təşkil edib ki, bu da ötən ilin analoji dövründəki göstəricidən 62 faiz çoxdur. Bu barədə Qiymətli Kağızlar üzrə Dövlət Komitəsindən bildirilib.
Hesabat dövründə səhmlərin dövriyyəsi 150,92 milyon manat təşkil edib, bu isə ötən ilin analoji dövründəki göstəricidən 3 dəfə çoxdur. Səhmlərin ilkin bazarında artım 179 faiz təşkil edib.
Korporativ istiqrazların dövriyyəsi 49 faiz artaraq 26,67 milyon manat təşkil edib. Bu göstəricinin artımının əsasını korporativ istiqrazların təkrar bazarında 24 dəfə artması təşkil edib.
Cari ilin yanvar-may aylarında qiymətli kağızlar bazarının dövriyyəsi 2,178 milyard manat təşkil edib ki, bu, ötən ilin analoji dövründəki göstəricidən 36 faiz azdır.
Dövlət istiqrazları bazarının dövriyyəsi 133 faiz artaraq 333,84 milyon manat təşkil edib. Ölkənin Mərkəzi bankının not bazarının dövriyyəsi isə 75 faiz azalaraq 267,67 milyon manat təşkil edib.
REPO və tərs REPO əməliyyatları 1,577 milyard manat təşkil edib.
Azərbaycanın qiymətli kağızlar bazarının ümumi həcmi 2009-cu ilin yanvar-may aylarında 2,356 milyard manat təşkil edib ki, bu da ötən ilin analoji dövründəki göstəricidən 32 faiz azdır.
İyunun 16-na olan rəsmi məzənnə 0,8039 AZN/USD təşkil edir.
Məqalə müəllifi ilə əlaqə ünvan: [email protected]
