Azərbaycan, Bakı, 02 iyul / Trend , müxbir Ü. İsmayılova /
Azərbaycanda ipoteka kreditlərinin bərpası təkrar əmlak bazarında, hətta ən ucuz mənzillərin qiymətinin 10 faiz bahalaşmasına səbəb olub. Bu barədə cümə axşamı "MBA Group" Konsaltinq şirkətinin baş direktoru Nüsrət İbrahimov məlumat verib.
"Artım obyektlərin vəziyyətindən asılı olaraq 5 faizdən 10 faizədəkdir", - İbrahimov bildirib.
Onun sözlərinə görə, məhz ucuz mənzillərin qiymətinin artımı o səbəbdən baş verir ki, onların qiyməti Mərkəzi Bankın nəzdində Azərbaycan İpoteka Fondunun (AİF) xətti ilə verilən ipoteka kreditlərinin maksimal həcmi - 50 min manat ilə üst-üstə düşür.
Orta və yüksəkqiymətli daşınmaz əmlak bazarındakı durumda dəyişiklik qeydə alınmayıb və onlar enməkdə davam edir.
Ekspertin sözlərinə görə, ipoteka kreditlərinin bərpasından sonra təkrar əmlak bazarında fəallıq üç dəfə artıb və bunun nəticəsində bazarda demək olar ki, nisbətən aşağı qiymətə satılmamış mənzil qalmayıb.
İbrahimov hesab edir ki, bazardakı kəskin sıçrayış sentyabra qədər davam edəcək, payızda isə vəziyyət stabilləşəcək.
"İlin sonlarına doğru ölkənin daşınmaz əmlak bazarında qiymətlər 8-10 faiz artacaq, lakin bazarda qiymətlərin kəskin artımı gözlənilmir", - İbrahimov bildirib.
İyunda Azərbaycanda ipoteka kreditlərinin bərpasının ilk ayında AİF-in xətti ilə ümumi məbləği təxminən bir milyon manat olan 20 kredit verilib. Bu gün AİF-ə 544 nəfər adi, 44 nəfər isə güzəştli kreditlər əldə etmək üçün müraciət edib. Daxil olan müraciətlərin ümumi kredit məbləği təxminən 26 milyon manatdır.
İpoteka Fondu Azərbaycanda ipoteka kreditlərinin verilməsinə başlanılan ilk ayda yüksək dinamikliyi qeyd edir. Çünki 2006-cı ilin martında AİF cəmi 4 ipoteka krediti vermişdi.
Fondun kredit səlahiyyətli təşkilatları 17 bankdır. 2009-cu il üçün dövlət büdcəsində sosial ipotekanın maliyyələşdirilməsi üçün 14 milyon manat nəzərdə tutulub və 55 milyon manat məbləğində ipoteka istiqrazları buraxılıb.
İyulun 02-nə olan rəsmi məzənnə 0,8042 AZN/USD təşkil edir.
Məqalə müəllifi ilə əlaqə ünvanı: [email protected]