Qazaxıstan, Astana, 05 avqust / Trend , müxbir K. Konırova /
Qazaxıstanda ölkə taxılının yeni dəyirman kompleksi üçün Bakı taxıl terminalına zəmanətli tədarükü barədə memorandum imzalanıb. Bu barədə Trend -ın Astanadakı xüsusi müxbirinə "Prodkorporasiya" SC-nin xarici iqtisadi fəaliyyət departamentinin direktoru Daulet Uvaşev məlumat verib.
"Söhbət yeni dəyirman kompleksi üçün yüksək keyfiyyətli, minimum 25 faizli özlü buğda tədarükündən gedir", - Uvaşev deyib.
"Prodkorporasiya" nümayəndəsinin sözlərinə görə, yeni dəyirman kompleksi payızda işə salınmalıdır.
"Memoranduma əsasən, Qazaxıstan Azərbaycan bazarının gələcəkdə yüksək keyfiyyətli un və çörəklə təminatı üçün yeni dəyirman kompleksində taxılın emalı üçün aylıq 7-10 min ton yüksək keyfiyyətli buğda tədarük edəcək. Tədarük təxminən bu ilin oktyabrından həyata keçirilməyə başlayacaq", - Uvaşev qeyd edib.
Qazaxıstan taxılı Azərbaycana quru yük kimi dənizlə Aktau limanından, eləcə də dəmiryolu nəqliyyatı ilə gətiriləcək.
"Bakı taxıl terminalı" illik 500-800 min ton gücə malikdir.
Terminalın yalnız Cənubi Qafqaz üçün taxıl qəbul etməsi deyil, Türkiyə və Şimali Afrikaya tranzitinə xidmət etməsi də nəzərdə tutulur.
Azərbaycanda Qazaxıstan taxılına böyük tələbat olduğuna görə, terminalın işə salınmasından sonra onun ərazisində yeni dəyirman kompleksinin tikilməsi barədə qərar qəbul edilib.
150 ton gücündə dəyirman kompleksi Qazaxıstan və Azərbaycan tərəfləri arasında paritet əsaslarla tikilir.
Məqalə müəllifi ilə əlaqə ünvanı: [email protected]