Azərbaycan, Bakı, 05 avqust / Trend , müxbir N.İsmayılova /
"2009-cu ilin birinci yarısında Azərbaycan dövlət büdcəsinin gəlir hissəsinə faktiki daxilolmalar 4,86 milyard manat (ÜDM-in 34 faizi) olub ki, bu da ötən ilin analoji dövrü ilə müqayisədə 1,1 faiz çoxdur", - çərşənbə günü hökümətdən bildirilib.
Büdcə xərcləri 8,4 faiz artaraq 4,4 milyard manat (ÜDM-in 31 faizi) təşkil edib. Altı ay ərzində büdcə profisiti 424 milyon manat (ÜDM-in 3 faizi) olub.
Daxilolmaların strukturunda 33,5 faiz (təxminən 1,6 milyard manat) Vergilər Nazirliyi tərəfindən təmin edilib. Vergi rüsumları və vergilərdən daxilolmalar 639,7 milyon manat (13,2 faiz xüsusi çəki) təşkil edib ki, bu da proqnozun 100,1 faizi deməkdir.
Hesabat dövründə bir milyard manatdan çox ƏDV daxil olub ki, bu da ümumi gəlirlərin 20,7 faizi deməkdir. Digər vergilərdə rəqəmlər belə olub: gəlir vergisi 535,2 milyon manat (11 faiz), mənfəət vergisi 298,5 milyon manat (6,1 faiz), aksiz vergisi 121,7 milyon manat (2,5 faiz), mülkiyyət vergisi 41,2 milyon manat (0,8 faiz), yeraltı sərvətlərdən istifadə vergisi 41,8 milyon manat (0,9 faiz), xarici iqtisadi fəaliyyət vergisi 115,4 milyon manat (2,4 faiz).
Sosial təminat və əhalinin müdafiəsi üçün büdcədən yanvar-iyun ayında 541 milyon manat (xüsusi çəkisi 12,2 faiz), təhsilə 513,5 milyon manat (11,6 faiz), səhiyyəyə 161,9 milyon manat (3,6 faiz), prokurorluq, təhlükəsizlik, hüquq-mühafizə orqanlar,və məhkəmə orqanlarının saxlanmasına 276,6 milyon manat (6,2 faiz), iqtisadiyyata sərmayə qoyuluşları iki milyard manata yaxın (44 faiz) olub. Kapital qoyuluşunun ümumi həcmindən mənzil-kommunal xərclərinə 79,4 milyon manat (1,8 faiz), kənd və meşə təsərrüfatına, balıqçılığa 128,9 milyon manat (2,9 faiz), nəqliyyat və rabitəyə 31 milyon manat (0,7 faiz) ayrılıb.
Dövlət xərclərinin 30,9 faizi (1,37 milyard manat) əhaliyə əmək haqqı, pensiya və müavinətlərin ödənilməsinə yönəldilib.
Avqustun 05-nə olan rəsmi məzənnə 0,8042 AZN/USD təşkil edir.
Məqalə müəllifi ilə əlaqə ünvanı: [email protected]
