Azərbaycan, Bakı, 11 avqust / Trend , müxbir N.İsmayılova /
İyulun 1-nə olan məlumata görə, Azərbaycanın AGLeasing şirkətinin lizinq portfelinin həcmi 11,67 milyon manat təşkil edib. Bu barədə şirkətdən məlumat verilib.
Müştərilərə verilən lizinq avadanlıqlarının ümumi məbləği ilin birinci yarısının sonuna olan məlumata görə 11,96 milyon manat təşkil edib.
AGLeasing şirkəti ilə bağlanmış lizinq müqavilələrinin ümumi miqdarı ilin birinci yarısının yekununa görə 142-dir.
AGLeasing lizinq portfelinin həcminə görə Azərbaycanın aparıcı lizinq şirkətlər qrupuna daxildir.
Şirkətin müştəriləri həm hüquqi, həm də fiziki şəxslər - sahibkarlardır.
AGLeasing 2005-ci ildə dörd təsisçi tərəfindən yaradılıb - AGBank (35 faiz), İngiltərənin "Hiperion Capital Management" şirkəti (30 faiz), ABŞ-ın "Delta Trans LLC" şirkəti (25 faiz) və İngiltərənin "Milio Leasing Limited" firması (10 faiz).
Şirkətin nizamnamə kapitalı bir milyon manatdır. AGLeasing Azərbaycanın kapitallaşmış lizinq şirkətlərindən biridir.
AGLeasing universal lizinq şirkəti kimi fəaliyyət göstərir və avadanlıqların geniş spektrinə üstünlük verir. Yalnız hələlik "Aqrolizinq" dövlət şirkəti ilə onun dövlətin maliyyəsi altında təklif etdiyi şərtlərə görə rəqabət apara bilmir.
AGLeasing-də hər layihənin maksimal həcmi 500 min dollara qədər təşkil edir. Müddət 20 faizdən çox avans ödəmə ilə beş ildir. İllik faiz dərəcəsi 22-24 faizdir.
Avqustun 11-nə olan rəsmi məzənnə 0,8043 AZN/USD təşkil edir.
Məqalə müəllifi ilə əlaqə ünvanı: [email protected]