Azərbaycan, Bakı, 31 avqust / Trend , müxbir Ü.İsmayılova /
Azərbaycanda Oğuz-Qəbələ bölgəsindən Bakıyadək uzunluğu 263 kilometr olan su kəmərinin 236,9 kilometrdən çox hissəsi artıq çəkilib. Bu barədə bazar ertəsi "Azərsu" SC-dən deyiblər.
"Su kəmərinin inşası üzrə işlər eyni vaxtda dörd istiqamətdə aparılır - Qəbələ rayonunda - Bakı-Oğuz istiqamətində, Ağsu rayonunda - Bakı-Göyçay istiqamətində, eləcə də Abşeron rayonunda Atyalı qəsəbəsində Oğuz rayonu istiqaməti üzrə 190 metr səviyyəsində", - SC-dən deyilib.
Oğuz-Qəbələ-Bakı boru kəmərinin quraşdırılmış hissəsində boruların hamarlanması, xidməti yolların inşası üzrə işlər görülüb, yol keçidləri və digər quraşdırmalar üzrə işlər başa çatdırılır.
Su mənbələrində 50 istifadə olunan və 19 müşayiətçi rezervuar qazılıb.
Beynəlxalq təcrübəyə uyğun olaraq Oğuz-Qəbələ-Bakı boru kəmərinin inşasına nəzarəti Almaniyanın "JES Jonsulting engineers Salzgitter" şirkəti keçirir.
Su kəmərinin inşasını və steklovatla izolya edilmiş plastik boruların quraşdırılmasını "Turan Xəzinədaroğlu İnşaat və Ticarət", "Tekser İnşaat Sənaye ve Ticarət", "Gəncə Körpü Tikinti 2" konsersiumu həyata keçirir.
Kəmərin buraxılış gücü saniyədə 5 kubmetr su təşkil edir. 2009-cu ilin birinci yarısının yekunlarına görə, layihənin realizəsinə Dövlət Neft Fondundan 68,5 milyon manat ayrılıb. 2009-cu il ərzində isə 100 milyon manatın ayrılması gözlənilir. Ümumiyyətlə, layihənin dəyəri 750 milyon manat (930 milyon dollardan yuxarı) səviyyəsində qiymətləndirilir.
Avqustun 31-nə olan rəsmi məzənnə 0,8039 AZN/USD təşkil edir.
Məqalə müəllifi ilə əlaqə ünvanı: [email protected]
