Azərbaycan, Bakı, 12 sentyabr / Trend /
İranın milli misəritmə sənayesi şirkəti və Finlandiyanın Outotec şirkəti "Sunqun" misəritmə zavodunun inşası məqsədi ilə müqavilə imzalayıblar. Zavodun illik gücü 200 min ton mis və 750 min ton sulfat turşusu olacaq. Məlumatı Mehr informasiya agentliyi yayıb.
İran tərəfdən müqaviləni milli şirkətin direktor müavini Əhməd Fəridi, Finlandiya tərfədən isə Outotec şirkətinin baş departamentinin direktoru Lars Helle imzalayıb.
"İranın milli şirkəti Yaxın Şərqdə "Sunqun" zavodunda Flash Smelting/Flash Converting sistemindən istifadə edəcək yeganə şirkətdir. Bu, misəritmə sahəsində ən müasir sistem hesab edilir", - Fəridi deyib.
Onun sözlərinə görə, İran ABŞ və Çindən sonra bu sistemdən istifadə edən üçüncü ölkə olacaq.
İran milli misəritmə sənayesi şirkəti ildə 206 min ton mis istehsal etməklə Asiyada 7-ci, dünyada isə 21-ci yeri tutur. "Yeni sistemin quraşdırılması ilə istehsal potensialı 440 min tona qədər artacaq", - Fəridi deyib.