Dünya Bankı "Azərbaycanda maliyyə xidmətlərinin inkişafı" layihəsi üzrə məsləhətçi cəlb edir
Azərbaycan, Bakı, 12 sentyabr / Trend , müxbir N.İsmayılova/
Dünya Bankı (DB) və Azərbaycan hökumətinin birgə layihəsi olan "Maliyyə xidmətlərinin inkişafı" layihəsi çərçivəsində məsləhətçi cəlb edilməsinə müsabiqə elan edilib, layihə qrupunun məlumatına deyilib. Layihənin əsas məqsədi "Azərpoçt" MMC dövlət poçt operatorunun institusional potensialının inkişafıdır.
Məsləhətçinin tapşırığına Rusiyanın maliyyə savadlılığı barədə sorğu modelinin Azərbaycan dilinə tərcümə edilməsi, sorğu aparılmasının ssenarisinin hazırlanması, sorğunun ölkənin bütün əhalisini əhatə etməsinə imkan verən metodologiyanın hazırlanması, sorğu aparan şəxslər üçün bütün lazımi materialların çap edilməsi və çatdırılması, eləcə də sorğu aparan şəxslərin fəaliyyətinin monitorinqi, sorğu metodologiyasını (Azərbaycan və ingilis dillərində) sənədlərlə dəstəkləyən tam hesabatın təqdim edilməsi və s. daxildir. Sorğu 1200 respondenti əhatə etməlidir.
Məsləhət xidməti göstərilməsi layihəsinin ehtimal olunan büdcəsi 40 min dollar təşkil edir. Bu da İsveçrə hökumətinin ayırdığı qrant hesabına ödəniləcək.
Namizədlər bu tələblərə cavab verməlidirlər: oxşar miqyasda sorğu aparılmasında iş təcrübəsi, yüksək ixtisaslı kadr potensialının mövcudluğu, yüksək keyfiyyətli nəzarət prosedurları. Maliyyə sahəsində və Azərbaycanda təcrübə arzuolunandır.
Maraq ifadələri 19 sentyabradək təqdim edilməlidir. Əlaqədar şəxs layihənin əlaqələndirmə qrupunun rəhbəri Ramazan Musayevdir: elektron ünvan: [email protected] və ya [email protected], telefonlar (99412) 497-39-70, 431-11-22 (dax.348).
"Maliyyə xidmətlərinin inkişafı" layihəsinin ümumi dəyəri 17,5 milyon dollardır. Bundan 12,25 milyon dollar DB-nin kreditinin, qalan hissə isə Azərbaycan hökumətinin payına düşür. Layihənin əsas komponenti ölkənin poçt şəbəkələrinin müasirləşirilməsidir. İsveçrə hökuməti də layihənin həyata keçirilməsinə 612 min dollarlıq texniki kömək göstərib.
Layihə çərçivəsində "Azərpoçt"un fəaliyyətinin maliyyə xidmətləri göstərilməsi sahəsində baş verən risklərin idarə olunması üzrə tələblərə müvafiq şəklə salınması nəzərdə tutulur. Gələcəkdə milli poçt operatorunun lisenziyalaşması gözlənilir.
"Poçt rabitəsi haqqında" qanuna düzəlişə əsasən, "Azərpoçt"un fuknsiyası artıq genişləndirilib. Yaxın zamanlarda ölkənin poçt şöbələri əhaliyə bank xidmətləri - pul köçürmələri, əhalinin əmanətlərinin qəbulu, eləcə də pensiya və təminatların verilməsi xidmətlərini göstərə biləcək. Bunlar poçt şöbələri tərəfindən hansısa maneə olmadan veriləcək. "Azərpoçt"un funksiyasına yalnız kredit xəttlərinin açılması daxil deyil.
Poçt şöbələri vahid bank sisteminə daxil deyil, lakin onlar bu sturkturun hissəsi kimidirlər. Buna görə də prudensial nəzarət və onların fəaliyyətinin tənzimlənməsi təqribən bank sistemindəkinə yaxın olacaq.
Hazırda ölkə ərazisində 1536 poçt şöbəsi fəaliyyət göstərir. Onlardan 337-si şəhər, rayon mərkəzləri və qəsəbələrdə, 1199-u isə kənd yerlərində əhaliyə xidmət göstərir.
Məqalə müəllifi ilə əlaqə ünvanı: [email protected]
