Azərbaycan, Bakı, 06 oktyabr / Trend , müxbir N.İsmayılova/
Rusiya kapitallı Azərbaycan bankı Nikoil Bank 2010-cu ildə nizamnamə kapitalını 5-10 milyon manat artırmağı planlaşdırır. Bu barədə bankın İdarə Heyətinin sədri Vasili Xamaza deyib.
"Hazırda bankın nizamnamə kapitalı 25 milyon manat təşkil edir, gələn ildə isə onu 5-10 milyon manat artırma istərdik, əlbəttə ki, hər şey bankın səhmdarlarının qərarından asılıdır", - Xamaza deyib.
Onun sözlərinə görə, nizamnamə kapitalını artırmaqda məqsəd maliyyə böhranı dövründə bank əmanətçilərinin riskini azaltmaqdan ibarətdir. "Kapital nə qədər çox olarsa, əmanətçilərin etimadı da bir o qədər çox olar", - o bildirib.
"Bizə kapitallaşmanı artırmaq bazardan daha çox pulları cəlb etmək üçün lazımdır. Bundan əlavə, biz banklar üçün nəzərdə tutulmuş gəlir vergisi imtiyazlarından da istifadə etmək niyyətindəyik. Bu imtiyazlara görə 2009-cu ildə kapitallaşmağa yönəlmiş gəlirlərə vergi şamil edilmir", - Xamaza deyib.
Onun sözlərinə görə, bankın ehtimal olunan sırf gəliri bu il üçün 1,5 milyon manat təşkil edir.
"Bu yüksək göstərici deyil və onunla izah olunur ki, səhmdarlarımızın və əmanətçilərimizin təhlükəsizliyini artırmaq üçün ehtiyatlarımızı artırırıq", - o dedi.
Nikoil Bank Azərbaycanda 1997-ci ildən fəaliyyət göstərir. 2008-ci ildə "Topaz İnvestments" şirkəti tərəfindən Nikoil Bank-ın nəzarət paketi alındıqdan sonra səhmdarların iştirakı aşağıdakı kimidir: "Topaz İnvestments" - 53,1%, Nikoil QSC - 28,7%, "Uralsib-İnvest" MMC - 13,9% və ISR Holding - 4,3%.
Oktyabrın 06-na olan rəsmi məzənnə 0,8033 AZN/USD təşkil edir.
Məqalə müəllifi ilə əlaqə ünvanı: [email protected]
