Azərbaycan, Bakı, 12 oktyabr / Trend , müxbir Ü.İsmayılova/
Standartlaşdırma, Metrologiya, Patent üzrə Dövlət Komitəsi ölkənin istehlak bazarlarında monitorinqləri davam etdirir. Bu monitorinqlər sayəsində istehlakçılarının hüquqlarının bərpa edilməsi istiqamətində müəyyən nəticələr əldə edilib, Dövlət Komitəsinin Ərzaq Məhsullarına Dövlət Nəzarəti sektorunun başçısı Mənsim Babayev bazar ertəsi təşkil edilən mətbuat konfransında deyib.
"Biz hazırda idxal edilən malların əksəriyyətində təlimatların Azərbaycan dilində olmasına nail olmuşuq", - Babayev deyib.
Onun sözlərinə görə, müəyyən nailiyyətlərə baxmayaraq, istehlakçı hüquqlarının pozulması sayəsində kifayət qədər problem var.
Babayev deyib ki, Dövlət Komitəsi tərəfindən aparılan monitorinqlər nəticəsində yanvar-avqust aylarında 257 min manat dəyərində sertifikatlaşdırılmamış istehlak mallar satışdan çıxarılıb.
Bu dövr ərzində insan sağlamlığı üçün təhlükəli olan 43 adda ərzaq məhsullarının istehsalı dayandırılıb və satışdan çıxarılıb.
Babayevin fikrincə, qanun pozuntularının əksəriyyəti un istehsalı və satışı sahəsində baş verir. Qanun pozuntularına, əsasən un istehsal edən dəyirmanlarda rast gəlinir ki, bunun da nəticəsində çörəyin növü göstərilən növə uyğun olmur. Çörək istehsalçıları çörəyin növünü - pəhriz, çovdar və ya borodinski olaraq göstərirlər. Lakin laborator müayinələr zamanı çörəyin tərkibində ikinci növ unla qarışdırılmış az miqdarda çovdar ununun olduğu müəyyən edilib.
Çörəyin çəki standartları barəsində danışan Babayev deyib ki, milli AZS 090 standartına müvafiq olaraq çörəyin bir ədədinin çəkisi 500 qramdan az olmamalıdır. Yalnız pəhriz çörəyinin və ticarət obyekti ilə istehsalçı arasındakı razılaşmaya əsasən istehsal olunan çörəyin çəkisi göstərilən çəkidən az ola bilər.
Bir sıra müəssisələrdə sertifikatlaşdırılmamış, lakin mütləq sertifikatlaşdırılmalı ərzaqlar satılır.
"Belə hallarda un istehsalçısı - hüquqi şəxs 4-5 min manat, fiziki şəxs isə 1,5-2 min manat məbləğində cərimə edilir", - Babayev deyib.
Şəkər məhsullarının istehsalı zamanı da antisanitar şərait müşahidə edilir. Bu müəssisələr saxta əmtəə nişanından istifadə edir və ya ümumiyyətlə istehlakçını göstərmirlər. Süd və süd məhsullarının istehsalı zamanı da bir çox qanun pozuntuları aşkarlanıb. Laborator müayinələrin nəticələrinə müvafiq olaraq, ərzaq məhsullarından birində mikrobioloji göstəricilər üzrə bağırsaq çöpü aşkarlanıb.
"Bu məhsulların istehsalı qadağan edilib və onlar satışdan çıxarılıb", - Babayev deyib.
Məqalə müəllifi ilə əlaqə ünvanı: [email protected]
