Azərbaycan, Bakı, 16 oktyabr / Trend , müxbir N.İsmayılov/
Azərbaycan Respublikası Vergilər Nazirliyi yanında Vergi Cinayətlərinin İbtidai Araşdırılması Departamenti 2009-cu ilin 9 ayı ərzində vergidən yayınma, qanunsuz sahibkarlıq və başqa faktlarla bağlı materiallar üzrə 180 cinayət işi başlamışdır ki, bu da 2008-ci ilin eyni dövründə başlanmış cinayət işlərinin (141) sayından 39 iş və ya 27,7 % çoxdur, nazirliyin cümə günü yayılmış məlumatında deyilir.
İbtidai istintaqı tamamlanmış 126 cinayət işindən vergiləri ödəməkdən yayınmaya görə 31 iş, qanunsuz sahibkarlığa görə 11 iş, aksiz markası ilə markalanmalı olan məhsulların (malların) belə marka olmadan satış məqsədilə əldə edilməsinə görə 7 iş, özgə əmlakını dələduzluq yolu ilə ələ keçirməyə görə bir iş və özgə əmlakını mənimsəməyə görə bir iş, cəmi 69 nəfər barəsində 51 cinayət işi baxılması üçün aidiyyəti məhkəmələrə göndərilmişdir.
Bir sıra müəssisələrin rəhbərləri və fiziki şəxslər yayındırdıqları vergiləri ibtidai istintaq zamanı tamamilə ödədiklərinə görə barələrində olan 51 cinayət işinə xitam verilmişdir.
İstintaqı tamamlanmış cinayət işləri üzrə vurulmuş ziyandan 8 milyon 273 min manat və cinayət işi başlanması rədd edilmiş materiallar üzrə isə 1 milyon 840 min manat, cəmi 10 milyon 113 min manat məbləğində vəsaitin dövlət büdcəsinə ödənilməsi təmin olunmuşdur. Bu da 2008-ci ilin eyni dövrü ilə müqayisədə dövlət büdcəsinə ödətdirilmiş vəsaitdən 2 milyon 088 min manat və ya 1,4 dəfə çoxdur.
Vergiləri ödəməkdən yayınma və qanunla istintaqı vergi orqanlarının səlahiyyətinə aid olan digər cinayətlər törətmiş 38 nəfər təqsirləndirilən şəxs barəsində məhkəmələr tərəfindən həbs qəti imkan tədbiri seçilmişdir.
Daxil olmuş əməliyyat məlumatları və müraciətlər üzrə müvafiq araşdırmalar aparılaraq, 98 şəxs haqqında toplanmış materiallar vergi qanunvericiliyinə uyğun olaraq tədbirlər görülməsi üçün aidiyyəti vergi orqanlarına göndərilmişdir.
Məqalə müəllifi ilə əlaqə ünvanı: [email protected]