Azərbaycan, Bakı, 30 oktyabr / Trend , müxbir E.İsmaylılov/
"Bakı metropoliteninin 20 illik inkişafı üzrə dövlət proqramı" çərçivəsində xarici şirkətlər konsorsiumu tərəfindən hazırlanan layihə baxılması üçün noyabrın sonunda bütün müvafiq instasiyalara təqdim ediləcək, cümə günü Bakmetropolitendən mənbə deyib.
Xarici şirkətlər konsorsiumuna Fransanın SYSTRA SA, Çexiyanın MOTT McDonalds və Cənubi Koreyanın SAMAN şirkəti daxildir. Bu konsorsiumda aparıcı rol Fransa şirkətinə məxsusdur.
"Hal-hazırda konsorsium tərəfindən hazırlanan layihənin müzakirəsi aparılır. Noyabrın sonunda bu layihə bütün müvafiq instansiyalara təqdim ediləcək. Bu instasiyalar layihəni nəzərdən keçirdikdən sonra fikir və təkliflərini irəli sürəcəklər", - mənbə deyib.
Onun sözlərinə görə, üç metro stansiyasının ("Müşfiq", "Cavadxan" və "Avtovagzal") inşaatı layihəsi də "Bakı metropoliteninin inkişaf proqramı"nın həyata keçirilməsi layihəsi çərçivəsində hazırlanıb. Yaxın zamanlarda bu metro stansiyalarının inşasına başlanılması planlaşdırılır. Bu layihə 40-dan çox yeni metro stansiyanın açılmasını nəzərdə tutur.
"Metropolitenin inkişaf proqramı" çərçivəsində paytaxtda sərnişin axınını əks etdirən şəhərin nəqliyyat modeli hazırlanıb. Şəhərdə səhiyyə və təhsil obyektlərinin yerləşməsini öyrənilməsi məqsədilə Səhiyyə və Təhsil nazirliklıri ilə də işlər aparılır.
Yeni proqramın hazırlanmasına başlamaq üçün Azərbaycan Prezidenti İlham Əliyevin "Bakı metropoliteninin perspektivli inkişafi ilə bağlı bəzi tədbirlər haqqında" sərəncamına əsasən, prezidentin ehtiyat fondundan 2 milyon manat ayrılıb.
Bakı metropoliteni 1967-ci ildən fəaliyyət göstərir və 21 stansiyaya malkidir. Bu ilin sonunda "Azadlıq" stansiyasının istismara verilməsi planılaşdırılır.
Məqalə müəllifi ilə əlaqə ünvanı: [email protected]
