Azərbaycan, Bakı, 18 yanvar / Trend , müxbir N.İsmayılova/
Azərbaycan bankı Bank of Azerbaijan 2009-cu ilin iyun ayından etibarən ölkənin Mərkəzi Bankı yanında fəaliyyət göstərən Azərbaycan İpoteka Fondunun (AİF) xətti ilə ipoteka kreditlərinin maliyyələşdirilməsinə 6 milyon manata yaxın vəsait ayırıb. Bu barədə bazar ertəsi bankın İdarə Heyətinin sədri Xəyal Şərifzadə bildirib.
"Ayrılan kreditlərin ümumi həcminin 5%-i sosial ipotekanın payına düşür. Qalan vəsait isə AİF-in adi şərtlərində verilib", - Şərif-zadə deyib.
Onun sözlərinə görə, bank 2010-cu ilin sonunadək öz ipoteka portfelini 35-40% artıraraq 10 milyon manata çatdırmağı planlaşdırır.
"Bank ölkə regionlarında da ipoteka kreditləri verir. Xüsusilə də Gəncə, Naxçıvan, Zərdab və Balakən şəhərlərində ipoteka kreditləri verilir", - Şərifzadə deyib.
Azərbaycanda İpoteka Fondu xətti ilə verilən adi ipotekaların maksimal məbləği 50 min manat, faiz dərəcəsi 8%, müddəti isə isə 25 il təşkil edir. Sosial ipoteka isə 35 min manat, illik faiz dərəcəsi 4%, müddəti isə 30 il təşkil edir. Adi və güzəştli kreditlər üçün ilkin ödəniş 15%-dir.
Bank of Azerbaijan 1993-cü ildə yaradılıb. Bank səhmlərinin 99%-i fiziki şəxslərə, 1%-i isə Dubayın NEM Holding şirkətinə mənsubdur.
Yanvarın 18-nə olan rəsmi məzənnə 0,8030 AZN/USD təşkil edir.
