Azərbaycan, Bakı, 18 fevral / Trend , müxbir N.İsmayılova/
Azərbaycan bankı Parabank öz strategiyası çərçivəsində 2010-cu ildə kiçik və orta sahibkarlığın kreditləşməsini genişləndirməyə davam etmək niyyətindədir. Bu barədə bankın xəzinə departamentinin direktoru Elnur Ağayev deyib.
"Hazırda ölkənin İqtisadi İnkişaf Nazirliyi nəzdində Sahibkarlığa Kömək Milli Fondunun xətti ilə verilən güzəştli kreditlərin ümumi həcmi 5 milyon manat təşkil edir. İlin sonunadək bu göstəricini 10-15 milyon manata çatdırmaq niyyətindəyik", - Ağayev deyib.
Onun sözlərinə görə, bank ölkənin Kənd Təsərrüfatı Nazirliyi nəzdində Kənd Təsərrüfatının Kreditləşməsi üzrə Dövlət Agentliyinin xətti ilə kredit portfelini artırmaq niyyətindədir.
"Hazırda Kənd Təsərrüfatının Kreditləşməsi üzrə Dövlət Agentliyinin xətti ilə 200 min manatlıq kredit yerləşdirilib. Bu göstəricini 1 milyon manata çatdırmağı planlaşdırırıq", - o deyib.
Bank Kreditanstalt für Wiederaufbau (KfW), Islamic Bank Development Busines (ISDB), Europian Bank Reconstraction and Development (EBRD), International Finance Corporation (IFC), Black Sea Trade & Development Bank (BSTDB), Commerzbank AG (GEM), TBC Bank (GEO) kimi maliyyə institutları ilə əməkdaşlıq edir.
Fevralın 18-nə olan rəsmi məzənnə 0,8034 AZN/USD təşkil edir.
