Azərbaycan, Bakı, 13 mart / Trend , müxbir E.İsmayılov/
Martın sonunda Bakı - Tbilisi - Qars dəmiryol nəqliyyatının inşası çərçivəsində Gürcüstanın Marabda ərazisində dəmiryol hissəsinin yenidənqurulması üzrə işlər başlanacaq. Bu barədə şənbə günü "Azərbaycan Dəmir Yolları" QSC-dən məlumat veriblər.
"Hazırda hazırlıq işləri aparılır, bu ayın sonunda isə artıq işlərə başlanılacaq", - mənbə bildirib.
Onun sözlərinə görə, yenidənqurma işləri Gürcüstan şirkəti və tenderin qalibi olan bizim "Azərtikintiservis" şirkəti ilə birgə aparılacaq. Şirkətin apardığı işlər çərçivəsində 160 kilometrlik dəmir yolunun yenidənqurulması üzrə işlər həyata keçiriləcək.
BTQ inşası üzrə işləri 2011-ci ilin sonuna başa çatdırmaq planlaşdırılır.
Layihə çərçivəsində Gürcüstan ərazisində Axalkalaki dəmiryol stansiyasının inşası üzrə tenderin qalibi artıq müəyyən olunub. Tenderin qalibi Azərbaycanın arxitektura layihə-sənaye şirkəti "Kontur" olub.
Axalkalaki stansiyasının tikintisinə 2010-cu ildə başlanılıb. 2011-ci ildə isə başa çatdırılması planlaşdırılır.
Bakı - Tbilisi - Qars layihəsi çərçivəsində 76 km Türkiyə ərazisindən, 29 km Gürcüstan ərazisindən keçən yeni 105 kilometrlik dəmiryol qovşağının tikintisi planlaşdırılır. Bundan əlavə, Gürcüstanda yükgötürmə qabiliyyətinin ildə 15 milyon tonadək artırılması üçün 183 kilometrlik Axalkalaki - Marabda - Tbilisi dəmiryol məntəqəsi bərpa ediləcək. Həmçinin, Axalkalakidə Gürcüstandakı dəmir yolundan qatarların Avropaya keçməsi üçün məntəqənin inşa edilməsi də planlaşdırılır.
