Azərbaycan, Bakı, 13 aprel /Trend, müxbir A.Bədəlova/
Asiya İnkişaf Bankı (AİB) 2010-cu ildə Azərbaycanda ümumi daxili məhsulun (ÜDM) həcmini 9,5 səviyyəsində, 2011-ci ildə isə 9,7 faiz səviyyəsində artacağını proqnozlaşdırır.
Bankın rəsmi saytında dərc olunan AİB-in 2010-cu il üçün icmalında (Asian Development Outlook) deyilir ki, dünya qiymətlərinin aşağı olmasına baxmayaraq, neft-qaz sektorunda yüksək aktivlik, həmçinin, antisikl siyasəti ölkəyə 2009-cu ildə canlanmış iqtisadi artımın saxlanılmasında kömək edib. 2010-cu ildə Asiya Bankı neftin qiymətinin və dövlət investisiyalarının həcminin artması fonunda da yüksək artımın saxlanılacağını gözləyir.
"Yüksək neft gəlirləri 2010-cu ildə Azərbaycan Dövlət Neft Fondundan ölkənin dövlət büdcəsinə transfertlərin (4,9 milyard manat və ya 6,1 milyard dollar həcmində göstərilib) artmasına imkan verəcək ki, bu da dövlət investisiyalarının artmasına və artımın yüksək səviyyədə saxlanılmasına imkan yaradacaq", - AİB-in məruzəsində bildirilir.
Sənədə əsasən, ölkənin kommunikasiya və nəqliyyat sektoru da iqtisadiyyatın artımına yardım göstərəcək.
Bank ölkədə inflyasiyanı 2010-cu ildə 5,8 faiz, 2011-ci ildə isə altı faiz səviyyəsində proqnozlaşdırır.
Bankın proqnozlarına görə, Azərbaycanda 2010 və 2011-ci illərdə ödəniş balansının profisiti ÜDM-in 23 faizi həcmində və ya müvafiq olaraq 14,8 milyard dollar və 21,7 faiz (16,2 milyard dollar) həcmində müşahidə olunacaq.
AİB 1966-cı ildə təsis olunub və 67 üzvü var. Bankın mənzil-qərargahı Filippinin paytaxtı Manilada yerləşir. Azərbaycan 1999-cu il dekabrın 22-də Asiya Bankına üzvlüyə qəbul olunub. Bankın kapitalında ölkənin iştirak payı 0,5 faiz təşkil edir.
AİB-in aparıcı səhmdarları Yaponiya və ABŞ-dır (ümumi səhmdar kapitalının 31,2 faizi), Hindistan və Çin (12,8 faiz), Avstraliya, Cənubi Koreya və Kanadadır (16 faiz).