Azərbaycan, Bakı, 28 aprel /Trend, müxbir E.İsmayılov/
Bakı Metropoliteni iki stansiyanın - "Memar Əcəmi -2" və "Avtovağzal" stansiyalarının tikintisini 2012-ci ilin sonuna kimi başa çatdırmağı planlaşdırır. Bu barədə çərşənbə günü Bakı Metropolitenindəki mənbə bildirib.
Mənbənin sözlərinə görə, hazırda layihələşdirmə, tikinti zonasında yerləşən kommunikasiyaların və obyektlərin yerlərinin dəyişdirilməsi işləri başa çatmaq üzrədir.
"Təxirəsalınmaz tikinti işlərinin may ayında başlanılması planlaşdırılır. İşlərin 2012-ci ilin sonunda başa çatdırılması nəzərdə tutulub", - mənbə deyib.
Bakı Metropoliteninin rəhbəri Tağı Əhmədovun daha əvvəllər dediyi kimi, metronun üçüncü xətti müasir tələblərə uyğun olaraq təşkil ediləcək. Digər xətlərdən fərqli olaraq, bu xəttin tunelinin diametri 5,8 metr təşkil edəcək, stansiyaların perronları yeddi vaqon üçün nəzərdə tutulacaq.
Həmçinin, mənbənin sözlərinə görə, hazırda daha bir stansiyanın - "Müşfiq" stansiyasının tikintisi üzrə irimiqyaslı işlər aparılır. "Burada artıq kotlavan hazırdır, bünövrə salınıb. Bu stansiyanın tikinti işlərinin növbəti ilin ortalarında başa çatdırılması gözlənilir", - o qeyd edib.
Bakı Metropoliteni 1967-ci ildən fəaliyyət göstərir, 22 stansiyası var.