Azərbaycan, Bakı, 27 may /Trend/
"Fitch Ratings" reytinq agentliyi Azərbaycan Beynəlxalq Bankının xarici valyutada uzunmüddətli emitentin defoltu reytinqini ("EDR") "BB+" səviyyəsindən "BBB-"dək yüksəldib. Bankın reytinq proqnozu "sabit"dir, - "Fitch" agentliyinin məlumatında deyilir.
Bu reytinq fəaliyyəti mayın 20-də Azərbaycanın milli və xarici valyutada uzunmüddətli emitentin defoltu reytinqlərinin "sabit" proqnozla "BBb+" səviyyəsindən "BBB-" səviyyəsinə kimi yüksəldilməsindən sonra baş verib. Qısamüddətli EDR xarici valyutada "B" səviyyəsindən "F3"dək, fərdi reytinq "D/E" səviyyəsində təsdiqlənib, dəstək reytinqi "3" səviyyəsindən "2"dək, uzunmüddətli EDR "BВ+"dən "BBВ-"dək yüksəldilib.
Azərbaycan Beynəlxalq Bankının reytinqinin yüksəldilməsi "Fitch"ın, zərurət yaranarsa, bankın ölkə hökumətindən dəstək alacağı ilə bağlı böyük ehtimalları haqda fikrinı əks etdirir. Bu zaman bankın Azərbaycanın bank sistemi və ümumilikdə, iqtisadiyyatı üçün önəmi, eləcə də bankın majoritar mülkiyyətçisinin (50,2%) ölkənin Maliyyə Nazirliyinin olduğu nəzərə alınır.
Bundan əlavə, reytinq fəaliyyəti bu maliyyə təşkilatının dəstəklənməsi üçün dövlətə əlverişli olan ehtiyatlara nisbətən bankın orta həcmini diqqətə çatdırır. Belə ki, 2010-cu ilin birinci rübünün sonunda ABB-nin passivləri 4,7 milyard manat, daha doğrusu, 2009-cu il üzrə ÜDM-in 14 faizini və ya 2009-cu ildə mərkəzi hökumətin büdcə gəlirlərinin 46 faizini təşkil edib. Həmin tarix üzrə bankın valyuta passivləri suveren rifah fondunun və rəsmi valyuta ehtiyatlarının ümumi həcminin 17 faizini təşkil edib. Bu passivlərin xaricdəki hissəsi (1,3 milyard dollar ekvivalentində, bunun 53 faizi "Middle East" bank qarşısında borcdur) suveren rifah fondunun və valyuta ehtiyatlarının həcminin 6 faizədək səviyyəsində qalıb.
Eyni zamanda, "Fitch" qeyd edir ki, ortamüddətli perspektivdə azalma olarsa, Azərbaycan Beynəlxalq Bankının reytinqlərinə təzyiqlər baş verə bilər. Əgər bank sürətlə genişlənmə apararsa, nəticədə, onun xarici borcları və balansı müvafiq suveren emitent mövqeyinə nisbətən daha böyük olacaq. Bundan əlavə, Maliyyə Nazirliyi bankda öz payını azaldarsa ("Fitch" qısamüddətli perspektivdə bu ssenarini az inandırıcı hesab edir) və ya bankın sistemli önəminin, dövlət siyasətinin həyata keçirilməsində onun rolunun və dövlətlə sıx əlaqələri azalacağı halda, reytinqlər düşə bilər. Azərbaycan Beynəlxalq Bankı ölkənin bank sisteminin bütün seqmentlərində hakim mövqe tutur. Bu zaman 2010-cu ilin birinci rübündə aktivlərinin payı 44, kreditləri 46, müştəri depozitləri 43 və pərakəndə depozitləri 23 faiz təşkil edib.
