Azərbaycan, Bakı, 15 iyul /Trend, müxbir İ.Xəlilova/
İlin birinci yarısında Azərbaycanda bütün maliyyə mənbələrindən iqtisadiyyatın və sosial sahələrin inkişafına 3766,9 milyon manat sərmayə qoyulub ki, bu da ötən ilin yanvar-iyun göstəricisini 10,9 faiz ötür. Bu barədə cümə axşamı Dövlət Statistika Komitəsinin məlumatında deyilir.
Təmir-tikinti işlərinə qoyulan investisiyaların həcmi 2483,8 milyon manat və tikinti sahəsinə qoyulan investisiyaların ümumi həcminin 65,9 %-ni təşkil edib. İstehsalat yönümlü tikinti obyektlərinə 1933,6 milyon manat, xidmətlər sahəsindəki obyektlərə 1833,3 milyon manat yönəldilib.
Ötən ilin analoji dövrü ilə müqayisədə 34,4 faiz artan xarici investisiyaların xüsusi çəkisinin ümumi həcmi 803,2 milyon manat təşkil etməklə, 21,3% olub. Müvafiq olaraq investisiyaların ümumi həcmindən 78,7% daxili investisiyaların (artım 5,9 faiz) payına düşür. Daxili investisiyaların böyük hissəsi (71,4 faiz) dövlət müəssisələrinə və təşkilatlara, yalnız 28,6 faizi özəl müəssisələrə qoyulub.
Əsas kapitala qoyulan vəsaitlərin 67,6 faizi (2544,6 milyon manat) ölkədə qeyri-neft sektorunun inkişafına, 32,4 faizi (1222,3 milyon manat) - neft sektorunun inkişafına yönəlib.
Bu zaman 44,7 faizi sənaye sahəsinin, 4,9 faizi kənd təsərrüfatının, meşə təsərrüfatı və balıqçılığın, 4,2 faizi ticarətin, 23,6 faizi nəqliyyat və anbar təsərrüfatının, 1,7 faizi tikintinin, 1,2 faizi informasiya və rabitənin, 1,5 faizi səhiyyənin, 0,9 faizi təhsilin, 8,4 faizi daşınmaz əmlak üzrə əməliyyatların (onların 8,3 faizi mənzil təsərrüfatının payına düşür), 3 faizi istirahət, əyləncə və incəsənət, 2,1 faizi dövlət idarəçiliyi, 0,1 faizi maliyyə və sığorta fəaliyyəti, 2 faizi mənizl və ictimai iaşənin təşkili, 1,1 faizi təhsilin, 0,9 faizi inzibati və yardımçı xidmətlərin, 0,5 faizi digər sahələrin payına düşür.
Maliyyələşdirilməsi büdcə vəsaitləri hesabına həyata keçirilən obyektlərin tikintisinə 2010-cu ildə nəzərdə tutulan 3549 milyon manatdan 1158,8 milyon manat sərmayə qoyulub.
Müəssisə və təşkilatların vəsaitləri hesabına əsas kapitala 2033,6 milyon manat (investisiyaların ümumi həcmindən 54 faiz), bank kreditlərindən - 165,4 milyon manat (4,4 faiz), büdcə vəsaitlərindən - 1236,6 milyon manat (32,8 faiz), büdcədənkənar fondların vəsaitlərindən - 195,1 milyon manat (5,2 faiz), əhalinin şəxsi vəsaitlərindən - 132,3 milyon manat (3,5 faiz), digər vəsaitlərdən - 3,9 milyon manat (0,1 faiz) sərmayə qoyulub.
