Azərbaycan, Bakı, 17 iyul /Trend, müxbir İ.Xəlilova/
Azərbaycanın Əmlak Məsələləri Dövlət Komitəsi "Gəncə-Qənnadı" Açıq Səhmdar Cəmiyyətinin səhmlərinin 30,03 faizinin satışına sərmayə müsabiqəsi elan edib. Bu səhmlər paketi pul hərracında satılmayıb.
Müsabiqədə həm yerli, həm də xarici sərmayədarlar iştirak edə bilərlər.
Namizədlər qənnadı və digər sənaye məhsullarının istehsalını, müvafiq avadanlığın alınması və quraşdırılmasını nəzərdə tutan sərmayə proqramını təqdim etməlidirlər.
Müsabiqə iştirakçıları sərmayə təklifinin dəyərinin 5 faizli bank zəmanətini, dövlət büdcəsinə 600 min manat ödənilməsi üzrə təklifləri təqdim etməlidirlər. Sərmayədarın şərt və tələblərin yerinə yetirilməsi üzrə niyyətinin ciddi olmasını təsdiq etmək üçün istənilən bankın 200 min manat məbləğində zəmanətli məktubu təqdim edilməlidir.
Namizədlər özəlləşdirmə planı ilə tanış olmaq və müsabiqə haqqında əlavə məlumat əldə etmək üçün 17 avqust 2010-cu il tarixdən etibarən Bakı ş., Y.Səfərov küç., 20 ünvanında (Tel: 490-24-08 (242) saat 10:00-dan 17:30-dək müraciət edə bilərlər. Sənəd və təkliflər 17 avqust 2010-cu il tarixinədək 10:00-dan 17:30-dək qəbul edilir. Təkliflər 19 avqust 2010-cu il tarixdə saat 16:00-da qiymətləndiriləcək.
"Gəncə-Qənnadı" ASC 1973-cü ildən qənnadı məhsullarının istehsalı ilə məşğuldur.
1 iyul 2010-cu il tarixinə olan vəziyyətə görə, ASC-nin nizamnamə kapitalı 5288,19 min manat təşkil edir. Bundan hər birinin nominal dəyəri iki manat olmaqla 2644,095 səhm buraxılıb.
Müsabiqənin predmetinin nominal dəyəri 1587,852 min manat olan 793 926 səhm təşkil edir.
Müəssisənin 860,964 min manat məbləğində öhdəliyi var. Əməkdaşlarının sayı 114-dür.
İyulun 17-nə rəsmi məzənnə 0,8036 AZN/USD təşkil edir.