Azərbaycan, Bakı, 27 avqust /Trend, müxbir N.İsmayılova/
Azərbaycan bankları iqtisadiyyatın kreditləşməsini 2009-cu ilin iyuluna nisbətdə 19,7 faiz artırıblar. Bu barədə Azərbaycan Mərkəzi Bankının (AMB) məlumatında deyilir.
İyulun sonuna banklar tərəfindən 8656,2 milyon manat kredit verilib (o cümlədən 5357,6 milyon manat milli valyutada və 3293,6 milyon manat valyutada). Bu göstərici iyulun 1-nə 8840,7 milyon manat (müvafiq olaraq 5311,3 milyon manat və 3529,4 milyon manat) və 2009-cu il avqustun 1-nə 7229,2 milyon manat (müvafiq olaraq 3856,5 milyon manat və 3372,7 milyon manat) təşkil edib.
İyulda milli valyutada verilən kreditlərin payı 61,9 faiz, xarici valyutada isə 38,1 faiz təşkil edir.
Ümumi portfeldən 400 milyon manat məbləğində istiqraz və borcların müddəti uzadılıb. Bu göstərici iyulun 1-nə 408,6 milyon manat, 2009-cu il avqustun 1-nə isə 262,4 milyon manat olub. Müddəti uzadılan kreditlərin statistikası "Aqrarkredit" bank olmayan kredit təşkilatının oxşar istiqrazlarını nəzərə almır.
İyulun sonuna olan məlumata görə, qısamüddətli kreditlər 2401,5 milyon manat olub. Bu göstərici iyunun sonuna 2266,8 milyon manat, ötən il avqustun sonuna isə 2116,6 milyon manat təşkil edib. İyulda iqtisadiyyatda qısamüddətli kreditlərin həcmi 5,9 faiz, 2009-cu ilin iyuluna nisbətdə isə 13,5 faiz artıb.
Uzunmüddətli kreditləşmə 6249,7 milyon manat, iyulun 1-nə 6492,9 milyon manat, 2009-cu ilin avqustun birinə isə 5112,6 milyon manat təşkil edib. İyulda uzunmüddətli kreditləşmənin həcmi 3,7 faiz, 2009-cu ilin iyuluna nisbətdə isə 22,2 faiz azalıb.
Məlumatda qeyd edildiyinə görə, iyulun sonuna Azərbaycan Beynəlxalq Bankı tərəfindən 44,2 faizlik xüsusi çəki ilə 3829,1 milyon manat, özəl banklar tərəfindən isə 53,7 faizlik xüsusi çəki ilə (0,7 faiz artım) 4644,7 milyon manat kredit verilib. Qalan 2,1 faiz bank olmayan kredit təşkilatlarının payına düşür. Onlar tərəfindən 182,4 milyon manat kredit verilib.
Avqustun 27-nə olan rəsmi məzənnə 0,8037 AZN/USD təşkil edir.
