Azərbaycan, Bakı, 20 sentyabr /Trend, müxbir Ü.Sadıxova/
Azərbaycan şirkətləri Misirin turizm, tikinti, telekommunikasiya və sənaye sahəsinə 1,47 milyon dollar investisiya yatırıblar. Bu barədə Misirin beynəlxalq əməkdaşlıq naziri, iqtisadi əməkdaşlıq üzrə Azərbaycan-Misir hökumətlərarası komissiyasının sədri xanım Faizə Əbu Nəca deyib.
"Hazırda Misirdə 1,47 milyon dollarlıq kapitalla 10 Azərbaycan şirkəti işləyir", - nazir bildirib.
İndi Azərbaycan bazarında iki Misir şirkəti işləyir. Onlardan biri ticarət sahəsində işləyir və məhsulları 2005-ci ildə Bakıda keçirilmiş sərgidə nümayiş olunub. İkinci şirkət turizm sahəsində işləyir. O, 2010-cu ilin aprelində yaradılıb.
Hazırda böyük əczaçılıq şirkəti "ACDIMA" şirkəti Abşeronda dərman istehsalı zavodu tikir. Hökumətlərarası komissiyanın üçüncü iclasında imzalanan bu zavodun tikintisi üzrə sazişə əsasən, "ACDIMA" şirkətinin direktoru Avad Tacəddinin başçılıq etdiyi nümayəndə heyəti əczaçılıq zavodunun tikinti ərazisi ilə tanış olmaq üçün 2010-ci ilin avqustundan sentyabrınadək iki dəfə Azərbaycanda olub.
"Misir Azərbaycanda investisiya həcminin artmasına səy göstərir və Azərbaycan da Misirdə investisiyaların artmasına səy göstərir. Azərbaycan və Misir tərəfləri Misirin bu sahələrdə təcrübəsini nəzərə alaraq, telekommunikasiya, informasiya texnologiyaları sahəsində işləyə bilərlər. Bundan başqa, tərəflər ərzaq məhsullarının qablaşdırılmasında da əməkdaşlıq edə bilərlər", - xanım Əbu Nəca deyib
Onun sözlərinə görə, Azərbaycan Misirin 2007-ci ildə Azərbaycan Prezidentinin Qahirəyə səfəri zamanı turizm sahəsində əməkdaşlıq haqqında imzalanan saziş əsasında turizm sahəsindəki təcrübəsindən istifadə edə bilər. Bundan başqa, Azərbaycanda Misirin turizm şirkəti fəaliyyət göstərir, Azərbaycanın iki turizm şirkəti isə Misirdə fəaliyyət göstərir. Hər il Misir Azərbaycanda "AITF" turizm sərgisində iştirak edir, 2009-cu ildə Misirdə Azərbaycan turistlərinin sayı 2008-ci illə müqayisədə 2480 nəfərdən 2870 nəfərdək artıb.
