Azərbaycan, Bakı, 28 sentyabr /Trend, müxbir E.İsmayılov/
İran Azərbaycana dəmir yolu və metro sahəsində əməkdaşlıq təklif edir. Bu barədə İran Prezidenti Aparatının İqtisadi məsələlərə nəzarət şöbəsinin rəhbəri, vitse-prezidentin müavini Əlağa Məhəmmədi bildirib.
Onun sözlərinə görə, İran ümumi dəyəri 12 milyard dollar olan dəmir yolu nəqliyyatının inkişafı üzrə proqramın və dəyəri 20 milyard dollar olan metropolitenin inkişafı üzrə proqramın reallaşdırılmasını planlaşdırır.
Məhz bu məqsədlə İran vitse-prezidentinin müavini Azərbaycan paytaxtında bu layihələrin həyata keçirilməsində iştirak etməyi Azərbaycan tərəfinə təklif edir. Azərbaycan tərəfi bu layihələrdə həm qismən maliyyələşdirmə, həm də yeni dəmir yolu xətlərinin tikintisində, bu tikintidə istifadə olunacaq malların tədarükü üzrə iştirak edə bilər.
"Biz bütün bunları sənaye istehsalının bir hissəsi hesab edir və ona görə də sizə bu sahədə əməkdaşlıq etməyi təklif edirik", - Məhəmmədi bildirib.
Həmçinin, Məhəmmədinin sözlərinə görə, İran müxtəlif avadanlıqların istehsalında böyük təcrübəyə malikdir və bu təcrübəni Azərbaycanla bölüşməyə hazırdır.
Azərbaycanın sənaye və energetika naziri Natiq Əliyevin sözlərinə görə, sahibkarların yüksək səviyyədə ikitərəfli əməkdaşlığa cəlb edilməsi üçün şəraitin yaradılması üzrə araşdırmanın aparılması vacibdir. Tərəflər arasında əməkdaşlığın daha çox inkişaf etməsi üçün informasiya mübadiləsi genişləndirilməlidir.
