Azərbaycan, Bakı, 30 sentyabr /Trend, müxbir E.İsmayılov/
İran Ələt qəsəbəsindəki (Azərbaycan) yeni beynəlxalq dəniz limanının tikintisi başa çatana kimi İranın Ənzəli limanının inkişafı ilə bağlı işlər həyata keçirəcək. Bu barədə cümə axşamı Bakıda İran Prezidenti Aparatının İqtisadi məsələlərə nəzarət şöbəsinin rəhbəri, vitse-prezidentin müavini Əli Ağa Məhəmmədi bildirib.
Onun sözlərinə görə, bu işlər Azərbaycandakı yeni beynəlxalq dəniz limanının tikintisi başa çatandan sonra meydana çıxacaq potensialdan istifadə məqsədilə aparılacaq.
Cümə axşamı Azərbaycanın Nəqliyyat Nazirliyindən deyildiyi kimi, yeni limanın tikintisinə yaxın vaxtlarda başlanacaq.
Ələt qəsəbəsində yeni beynəlxalq dəniz limanının inşası üç mərhələdə həyata keçiriləcək və 2015-ci ildə başa çatacaq. Layihənin 2008-2010-cu illəri əhatə edən birinci mərhələsi iki bərə, konteynerlərin, "ro-ro" tipli gəmilərin və adi (universal) quru yük gəmilərinin qəbulu üçün üç yük körpüsünün tikintisini nəzərdə tutur. Layihənin ikinci mərhələsi 2011-2013-cü illəri əhatə edir və üçüncü mərhələ isə (2014-2015-ci illər) əlavə olaraq 2 yük körpüsünün tikilməsini nəzərdə tutur. Limanın inşa layihəsi 400 mln dollardan çox qiymətləndirilir.
Liman ildə 11,6 milyon ton yük qəbul edə biləcək.
Hazırda Xəzər dənizində cəmi altı - Bakı (Azərbaycan), Türkmənbaşı (Türkmənistan), Aktau (Qazaxıstan), Həştərxan (Rusiya), Ənzəli və Neka (İran) beynəlxalq ticarət limanı fəaliyyət göstərir.
