...

"Citigroup" Azərbaycanda öz bankının filialının açılmasında maraqlıdır

Biznes və iqtisadiyyat xəbərləri Materials 5 Oktyabr 2010 18:04 (UTC +04:00)

Azərbaycan, Bakı, 5 oktyabr /Trend, müxbir N.İsmayılova/

Azərbaycana səfər edən "Citigroup"un nümayəndə heyəti Azərbaycanda "Citibank"ın filialının açılmasına marağını təsdiq edib. Bu barədə çərşənbə axşamı Azərbaycan Mərkəzi Bankının (AMB) Kredit təşkilatlarının fəaliyyətinə nəzarət departamentinin rəhbəri Rəşad Orucov deyib.

"Ölkədə bankın nümayəndəliyi artıq fəaliyyət göstərir, lakin bank filialın açılmasına olan marağını hələ nümayəndəliyin açılışı zamanı bildirmişdi", - Orucov qeyd edib.

Onun sözlərinə görə, nümayəndə heyətinin səfəri zamanı filialın açılma müddəti barədə danışılmayıb.

"Biz başa düşürük ki, bankın dünya maliyyə böhranı zamanı bəzi çətinlikləri olub, lakin nümayəndə heyətinin üzvlərinin filialın açılması fikri qüvvədədir", - o bildirib.

Mərkəzi Bankın sədri Elman Rüstəmov oktyabrın 1-də icraçı dierktor Bo Hammerikin başçılıq etdiyi "Citigroup"un nümayəndə heyətini qəbul edib.

Görüşdə "Citigroup" nümayəndə heyətinin üzvləri AMB ilə əməkdaşlıq üçün perspektivlərin olduğunu qeyd ediblər. Görüş çərçivəsində Azərbaycan iqtisadiyyatının inkişafı, xüsusilə də maliyyə sektorunun və ölkənin dövlət və özəl sektorlarının inkişafı üzrə gələcək investisiya planları ilə bağlı fikir mübadiləsi aparılıb.

"Citigroup Inc." maliyyə xidməti sahəsində dünyanın liderlərindən biri olan böyük beynəlxalq korporasiyadır. Qrup 1998-ci il aprelin 7-də "Citicorp" və "Travelers Group"un birləşməsi nəticəsində yaradılıb. Bank ümumi dəyəri 1,9 trilyon dollardan çox olan aktivləri idarə edir.

"Citigroup" ABŞ xəzinədarlığının qiymətli kağızlarının ilkin dileridir.

Xəbər lenti

Xəbər lenti