Azərbaycan, Bakı, 8 oktyabr /Trend, müxbir İ.Xəlilova/
Cümə günü Azərbaycan Milli Məclisi Qiymətli Kağızlar üzrə Dövlət Komitəsi (QKDK) tərəfindən hazırlanan "İnvestisiya fondları haqqında" qanun layihəsini ikinci oxunuşda qəbul edib.
Parlamentin İqtisadi siyasət komitəsinin sədri Ziyad Səmədzadə qanun layihəsini təqdim edərkən deyib ki, bu qanunun qəbul edilməsi investisiya fondlarının inkişafında mühüm rol oynayacaq.
"Bu qanun layihəsi ölkədə investisiya fondlarının təşkili, idarə olunması və likvidliyini, fondların fəaliyyətinin dövlət nəzarətinin və nizamlanmasının iqtisadi və hüquqi əsaslarını müəyyənləşdirir", - Səmədzadə bildirib.
Qanun layihəsi birinci oxunuşda qəbul edildikdən sonra, işçi qrup qanun layihəsinin müzakirəsi zamanı deputatların səsləndirdikləri təkliflərin müzakirəsi məqsədilə bir neçə iclas keçirib. Lakin qanun layihəsinə köklü dəyişiklik edilməyib, dəyişikliklər isə əsasən redaktiv və stilistik xarakter daşıyır.
Yenin qanunun hazırlanması 1999-cu ildə qəbul edilən "İnvestisiya fondları haqqında" Qanunun müasir tələblərə cavab verməməsi ilə əlaqədardır.
Yeni qanun ölkədə qiymətli kağızlar bazarının inkişafına xidmət edəcək; bu da ölkə iqtisadiyyatının diversifikasiya prosesinə öz töhfəsini verəcək.
Qanun layihəsinin hazırlanmasında 30 ölkənin təcrübəsi öyrənilib. Layihə dünya maliyyə bazarlarında əldə edilən nəticələr əsasında tamamlanıb.
Qanun layihəsi 2008-ci ilin əvvəlində, dünya maliyyə bazarlarında böhran vəziyyətinin kəskinləşməsi dövründə hazırlanmağa başlanıb.
"Bu qanunun qəbul edilməsi investisiya fondlarının inkişafında mühüm rol oynayacaq", - Səmədzadə bildirib. - "Qanun layihəsi ölkədə investisiya fondlarının təşkili, idarə olunması və likvidliyini, fondların fəaliyyətinin dövlət nəzarətinin və nizamlanmasının iqtisadi və hüquqi əsaslarını müəyyənləşdirir".
Belə qanunun qəbul edilməsi bazarda təklifləri genişləndirməyə imkan verəcək; belə ki, investisiya fondları yeni alətlərin yaranmasını stimullaşdıracaq, əməliyyatların həcmi genişlənəcək və iştirakçılar üçün daha əlverişli şərait yaradılacaq.
Qanunun yeni redaktəsi investisiya fondlarının fəaliyyətində bəzi yeniliklərin tətbiqini nəzərdə tutur. Məsələn, hazırda qüvvədə olan qanuna əsasən, Azərbaycanda investisiya fondları yalnız səhmdar cəmiyyət formasında yaradıla bilər. Qanunun yeni redaktəsində isə səhmdar-investisiya fondlarının, payçı, o cümlədən, açıq, qapalı və intervaltipli investisiya fondlarının, qapalı payçı investisiya fondlarının yaradılması nəzərdə tutulur. Beləliklə, qanun layihəsində investisiya fondlarının fəaliyyət sahəsində qüvvədə olan mexanizminin maksimum liberallaşdırılması nəzərdə tutulur.
Qanunun yeni redaktəsi investisiya fondlarının lisenziyalaşdırma prosedurunu dəqiq müəyyənləşdirir. Qanun layihəsinə əsasən, lisenziyalaşdırma iki mərhələdən ibarət olacaq. Birinci mərhələdə investisiya fondu yaratmaq istəyən şəxslər QKDK-ya fondun yaradılmasının məqsədəuyğunluğuna dair icazənin alınması üçün müraciət etməli olacaqlar. Bu müraciətin baxılma müddəti 60 gün təşkil edəcək. İkinci mərhələdə artıq dövlət qeydiyyatından keçdikdən sonra yaradılan fond hüquqi şəxs kimi, Dövlət Komitəsinə bilavasitə lisenziya üçün müraciət etməlidir. Lisenziya almaq üçün müraciətin baxılma müddəti 30 gün təşkil edir.
1999-cu ildən etibarən Azərbaycanda yalnız bir fond yaradılıb. Bu, "Sigma" çek-investisiya fondudur. Onun fəaliyyət dövrü qısa olub.
