Azərbaycan, Bakı, 16 oktyabr/Trend, müxbir N.İsmayılova/
BMT-nin Təhlükəsizlik Şurasının "Əl-Qaidə" və "Taliban"a qarşı Sanksiyalar Komitəsinin 1267 və 1373 saylı qətnamələrinə uyğun olaraq, beynəlxalq siyahıya dəyişikliklər edilib. Bununla əlaqədar olaraq, Azərbaycan Mərkəzi Bankı yanında Maliyyə Monitorinqi Xidməti terrorizmi dəstəklədiyinə görə beynəlxalq sanksiyalar rejimi altında olan hüquqi və fiziki şəxslərin siyahısına müvafiq dəyişikliklər edib. Bu barədə xidmətin şənbə günü yayılan məlumatında deyilir.
Məlumata əsasən, yuxarıda göstərilən dəyişikliklər nəzərə alınmaqla Birləşmiş Siyahı 2010-cu ildə artıq 24-cü dəfə yenilənmişdir. Siyahının yenilənməsi ilə bağlı qərarlar BMT-nin Təhlükəsizlik Şurasının üzvləri və regional təşkilatların təmin etdiyi informasiya əsas götürülməklə qəbul edilir.
Qeyd edək ki, Azərbaycan Respublikasının Nazirlər Kabinetinin 25 iyun 2010-cu il 124 saylı Qərarı ilə təsdiq edilmiş qaydalara əsasən, Azərbaycan Respublikasının Xarici İşlər Nazirliyinin təqdimatı əsasında barələrində sanksiyalar tətbiq edilməli olan fiziki və hüquqi şəxslərin Beynəlxalq Siyahısı Azərbaycan Respublikasının Mərkəzi Bankı yanında Maliyyə Monitorinqi Xidməti tərəfindən təsdiq edilir və yenilənir. Müvafiq məlumatlar nəzərə alınmaqla Maliyyə Monitorinqi Xidməti tərəfindən təsdiq edilmiş Beynəlxalq Siyahı monitorinq subyektlərinə və nəzarət orqanlarına təqdim edilir.
Bu qaydaların 26-cı bəndinə əsasən, "Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında" Azərbaycan Respublikasının Qanununa uyğun olaraq monitorinq iştirakçıları və monitorinqdə iştirak edən digər şəxslər Siyahıda göstərilmiş fiziki və ya hüquqi şəxslərin pul vəsaitlərini və ya digər əmlakını aşkar etdikdə qanunla müəyyən edilmiş qaydada belə pul vəsaitləri və ya digər əmlakla hər hansı əməliyyatı icra etməməli və bu barədə məlumatı Maliyyə Monitorinqi Xidmətinə təqdim etməlidirlər.
