Azərbaycan, Bakı, 11 noyabr /Trend, müxbir A.Axundov/
Çərşənbə günü Azərbaycanın sığorta şirkəti "Alfa Sığorta" avtomobil sığortası üzrə yeni kompleks məhsulu təqdim edib.
Məhsulun təqdimatında çıxış edən şirkətin direktorlar şurasının sədri Xəyal Məmmədxanlının sözlərinə görə, "Alfa Milaj" məhsulunun sahibləri üçün sığorta haqqı sığorta olunanın sürdüyü avtomobilin kilometrajından və ya onun sürməyi planlaşdırıdığı kilometrajdan asılıdır. Halbuki sığorta təminatı tamdır.
Məmmədxanlının sözlərinə görə, bundan başqa, şirkət səyahətlərin sığortalanması üzrə yeni məhsullar hazırlayıb.
"Adətən, yerli şirkətlər səyahətçiləri yalnız bədbəxt hadisələrdən sığorta edirlər. Bizim məhsullar müştərilərə baqajın itirilməsi kimi başqa hadisələrdən də sığortalanmağa imkan verir", - Məmmədxanlı qeyd edib.
"Alfa Sığorta" ASC-nin təsisçisi 2006-cı ilin dekabrında şirkətin səhmlərinin 100 faizini alan yerli "Texnikabank" ASC-dir.
"Alfa Sığorta"nın sığorta xidmətinin 30 növü, o cümlədən 6 icbari və 24 könüllü növ üzrə xidmət göstərmək üçün lisenziyaya malikdir. Şirkətin nizamnamə kapitalı 3,1 milyon manat təşkil edir.
Noyabrın 11-nə olan rəsmi məzənnə 0,8 AZN/USD təşkil edir.
