Özbəkistan, Daşkənd, 15 noyabr /Trend, müxbir D.Əzizov/
Yaxın vaxtlarda İran körfəzi və Mərkəzi Asiya ölkələrinin müvafiq idarələrinin nümayəndələri tərəfindən Mərkəzi Asiya - İran Körfəzi nəqliyyat-kommunikasiya dəhlizinin yaradılmasının və fəaliyyət göstərməsinin bütün aspektlərini reqlamentləşdirən ətraflı təkliflərin və ayrıca sənədin hazırlanması üçün birgə komissiyanın yaradılmasını nəzərdə tutan çərçivə sazişinin imzalanması lazımdır.
Bu fikrə keçən həftə Tehranda keçirilən Asiyada əməkdaşlıq üzrə xarici işlər nazirləri iclasının iştirakçıları gəliblər. Bu barədə Özbəkistan XİN-in mətbuat xidməti məlumat verib. Bu görüşdə Özbəkistanı Baş nazirin müavini Elyer Qəniyev və xarici işlər naziri Vladimir Norov təmsil ediblər.
İclas çərçivəsində Özbəkistan, Türkmənistan, İran və Oman nümayəndə heyətlərinin Mərkəzi Asiya və İran körfəzi dövlətləri arasında nəqliyyat-kommunikasiya dəhlizinin yaradılması məsələlərinin müzakirəsi üzrə dördtərəfli görüşü keçirilib.
Özbəkistan Prezidenti İslam Kərimovun oktyabrda Aşqabada səfəri zamanı region və İran körfəzi ölkələrini birləşdirəcək nəqliyyat-kommunikasiya dəhlizinin yaradılması ilə bağlı təşəbbüsünü iştirakçı ölkələrin nümayəndə heyətlərinin rəhbərləri dəstəkləyiblər.
Aşqabadda Kərimov Özbəkistan, Türkmənistan, İran, Oman, Qətər və İran körfəzinin digər ölkələrini birləşdirən nəqliyyat dəhlizinin layihəsini hazırlamağı təklif edib.
"İclas iştirakçıları perspektivdə bu ideyanın həyata keçirilməsinin regional ticari-iqtisadi proseslərin inkişafına meydan olacağı barədə yekdil fikrə gəliblər", - XİN mətbuat xidməti bildirib.
