Azərbaycan, Bakı, 26 noyabr /Trend/
Azərbaycanın ən iri sığorta şirkətlərindən biri olan "Atəşgah" SŞ-nin idarə heyətinin tərkibində kadr dəyişikliyi edilib. Bu barədə şirkətin cümə günü yaydığı məlumatda deyilir.
Səmdarların ümumi yığıncağının qərarı ilə 2010-cu il noyabrın 26-dan şirkətin idarə heyətinin sədri vəzifəsinə Tələt Səfərov təyin edilib. O, indiyədək " Atəşgah" SŞ-nin idarə heyəti sədrinin müavini vəzifəsini tutub.
Tələt Səfərov 1980-ci ildə Bakıda anadan olub. AAÖİ (Asiya və Afrika ölkələri İnstitutu) və M.V.Lomonosov adına MDU-nun hüquq fakültəsini bitirib. 1998-ci ildə Moskvanın bank sektorunda peşə karyerasına başlayıb. 2007-ci ildə Azərbaycana qayıdıb və əmək fəaliyyətini "Qafqaz" sığorta şirkətinin idarə heyəti sədrinin müavini kimi davam etdirib. 2008-ci ildə "Atəşgah" SŞ idarə heyəti sədrinin müavini təyin edilib.
"Atəşgah" SŞ idarə heyətinin keçmiş sədri Azər Əliyev indi Azərbaycan Sığortaçılar Assosiasiyasının (ASA) sədri vəzifəsini tutur.
"Atəşgah" SŞ 1996-cı ilin dekabrında yaradılıb. 2010-cu ilin doqquz ayının yekunları üzrə "Atəşgah" sığorta haqlarının yığılmasına görə Azərbaycanın sığorta şirkətləri renkinqində üçüncü yeri tutur. Şirkətin Bakıda beş ofisi, ölkə ərazisində altı regional nümayəndəliyi var.