Azərbaycan, Bakı, 7 dekabr /Trend, müxbir İ.Xəlilova/
Asiya İnkişaf Bankı (AİB) uzunluğu 22,15 kilometr olan Masallı-Astara avtomagistralının birinci hissəsinin tikintisinin başlayacağını gözləyir. Bu barədə çərşənbə axşamı bankın Bakı nümayəndəliyindən deyiblər.
"Yolun bu hissəsinin tikintisi üçün podratçı təsdiqlənmənin final mərhələsindədir və ilin sonunadək bütün məsələlərin, o cümlədən müqavilənin imzalanmasının razılaşdırılması mümkün ola bilər", - nümayəndəlikdən bildiriblər.
Azərbaycan Nəqliyyat Nazirliyi yanında "Azəryolservis" ASC-də gözləyirlər ki, tikinti işləri gələn ilin martınadək başlayacaq.
Layihə AİB tərəfindən Azərbaycan hökuməti ilə birlikdə maliyyələşdirilir.
Podratçı ikizolaqlı yolu, iki yol keçidini, 10 körpünü, drenaj sistemini və kəsişən yolların üstündən salınan bir körpünü tikməlidir.
Bundan əvvəl "Azəryolservis" ASC podratçının müəyyənləşdirilməsi üzrə tenderin nəticələrini texniki səbəblərə görə ləğv edib. AİB-in şərtlərinə görə, podratçı yalnız yol yaxınlığında torpaqların alınması prosesi başa çatdıqdan sonra elan edilə bilər. "Azəryolservis"də hesab edirlər ki, bu proses artıq həll edilib, yalnız vəsaitlərin köçürülməsi qalıb. Layihənin həyata keçirilməsinin yubadılması ilə əlaqədar Asiya İnkişaf Bankı (AİB) Masallı-Astara avtomagistralının bir hissəsinin yenidən qurulması layihəsi çərçivəsində Azərbaycan tərəfindən kredit vəsaitlərindən istifadə üçün müddəti 31 dekabr 2013-cü il tarixədək uzadıb. Saziş 2008-ci ilin yanvarından qüvvəyə mindikdən etibarən 2 il yarım ərzində kredit resursları demək olar ki, istifadəsiz qalıb və onlardan istifadə müddəti 30 iyun 2010-cu il tarixdə başa çatıb.
Masallı-Astara yolu Asiya İnkişaf Bankının (AİB) 200 milyon dollar dəyərində krediti və Azərbaycan hökumətinin 49 milyon dollarlıq iştirak payı hesabına çəkiləcək.
Layihəyə başlamaq üçün başlıca məsələlərdən biri Masallı-Astara avtomagistralı yaxınlığında torpaq alışı planının həyata keçirilməsidir. Kredit razılaşmasının şərtlərinə əsasən, torpaq alışı ilə bağlı məsələ 2010-cu ilin iyununadək həll edilməli idi.
Masallı-Astara yolu üç hissəyə bölünüb. Hazırda Masalı-Astara avtomagistralının birinci hissəsinin tikintisi üzrə podratçı müəyyənləşib, lakin şirkətin adı onun namizədliyi bank tərəfindən təsdiq edildikdən sonra açıqlanacaq. AİB-in nümayəndəliyindən deyiblər ki, yolun digər iki hissəsi üzrə də tender bağlıdır və indi şirkətlərin təkliflərinin qiymətləndirilməsi prosesi gedir.
Layihə AİB Direktorlar Şurasında 2007-ci il sentyabrın 28-də təsdiqlənib, bankla kreditin verilməsi sazişi isə 2009-cu il yanvarın 15-də imzalanıb. Asiya bankının kredit resursları bankın adi resurslarından hissə-hissə (190 milyon dollar) 24 il müddətinə dördillik güzəştlə və ildə libor+0,6 faizlə verilib. 10 milyon dollar güzəştli kredit isə 32 il müddətinə, səkkizillik güzəştli dövrlə və güzəştli dövr ərzində 1 faizlə, qalan dövrlər üzrə 1,5 faizlə verilib. Kreditin güzəştli hissəsi avtomagistrala birləşən ikinci dərəcəli kənd yollarının yenidən qurulmasına hesablanıb.
Masallı-Astara avtomobil yolunun yenidən qurulmasına "Multitranche Financing Facility" (MFF) mexanizmi çərçivəsində 500 milyon dollar məbləğində kredit təqdim edilib və üç yol layihəsinin maliyyələşdirilməsinə hesablanıb. Bu günədək iki layihə razılaşdırılıb, AİB MFF çərçivəsində qalan vəsaitlərdən istifadəyə isə 2014-cü ilədək vaxt ayırıb.