Azərbaycan, Bakı, 27 dekabr /Trend, müxbir Ü.İsmayılova/
Azərbaycanda yeganə təkrar sığorta şirkəti "AzRe Təkrar Sığorta " 2010-cu il ərzində fəaliyyətinin yekunları üzrə proqnozlaşdırılan səviyyədə sığorta haqlarını artıq toplayıb. Bu barədə bazar ertəsi şirkətin idarə heyətinin sədri Vüsal Abbasov bildirib.
"Cari il ərzində şirkətin sığorta haqları 20-25 milyon manat civarında proqnozlaşdırlırdı və biz bu səviyyədə yığımı təmin etdik", - Abbasov deyib.
Onun sözlərinə görə, şirkətin məcmu kapitalı 20 milyon manatadək, nizamnamə kapitalı isə 12 milyon manatadək çatdırılıb.
Azərbaycanın birinci təkrar sığorta şirkəti "AzRe Reinsurance" 7 noyabr 2007-ci ildə təkrar sığorta fəaliyyəti göstərmək üçün Azərbaycan Maliyyə Nazirliyindən lisenziya alıb. Şirkətin səhmdarları altı fiziki şəxsdir. Şirkət yerli və regional sığorta, təkrar sığorta şirkətləri və təkrar sığorta vasitəçiləri ilə əmlak, tikinti-quraşdırma riskləri, su, hava və avtomobil nəqliyyatı vasitələri, yüklər, bədbəxt hadisələr, məsuliyyət və maliyyə risklərinin sığortası üzrə xidmət göstərir.
Abbasovun sözlərinə görə, hazırda şirkət bütün yerli sığorta şirkətləri ilə fəal əməkdaşlıq edir, hətta ilin ortalarından beynəlxalq sığorta bazarına çıxıb, eləcə də Rusiya, Qazaxıstan, Gürcüstan kimi ölkələrdə, Yaxın Şərq ölkələrində, ƏƏmanda, Dubayda riskləri qəbul edir.
"Bu gün şirkətin əsas məqsədi ümumi portfeldə xarici müqavilələrin payının artırılmasıdır. Gələcəkdə hətta yerli bazardakı pay üzərində təkrar sığorta müqavilələrinin payının artırılması da mümkün olacaq", - Abbasov bildirib.
Dekabrın 27-nə olan rəsmi məzənnə 0,7985 AZN/USD təşkil edir.