Azərbaycan, Bakı, 13 yanvar /Trend, müxbir N.İsmayılova/
Yanvarın 17-dən etibarən Bakı Fond Birjasında Azərbaycan İpoteka Fondunun (AİF) 10 milyon manat məbləğində faizli, adlı, sənədsiz, təmin edilmiş istiqrazlarının yerləşdirilməsi başlanacaq. Bu barədə AİF-in cümə axşamı yaydığı məlumatda deyilir.
Emissiya prospektinə əsasən, yerləşdirmə kütləvi təklif üsulu ilə keçiriləcək. İstiqrazlar nominal dəyərlə satışa çıxarılacaq.
İstiqrazların ödənmə tarixi - 11 dekabr 2017-ci ildir. Təqdim edilmiş sifarişlər təklifdən çox olduğu halda sifarişlər proporsional qaydada təmin ediləcək. İstiqrazların ilkin yerləşdirilməsində iştirak edən təşkilat Azərbaycan Mərkəzi Bankıdır.
AİF-in istiqrazlarının emissiya prospekti Qiymətli Kağızlar üzrə Dövlət Komitəsi tərəfindən 19 noyabr 2010-cu il tarixində qeydə alınıb.
Emissiyanın ümumi həcmi 60 milyon manat təşkil edir, bir istiqrazın nominal dəyəri min manat, istiqraz üzrə faiz dərəcəsi 3 faiz təşkil edir.
İnidəyədək AİF 55 milyon manat məbləğində təmin edilmiş ipoteka istiqrazlarını və 75 milyon manat məbləğində təmin edilməmiş istiqrazların iki emissiyasını yerləşdirib.