Azərbaycan, Bakı, 17 fevral /Trend, müxbir N.İsmayılova/
May ayında Azərbaycan cinayət yolu ilə əldə edilmiş pul vəsaitlərinin və terrorçuluğun maliyyələşdirilməsinə qarşı mübarizə tədbirlərinin qiymətləndirilməsi üzrə Ekspertlər Komitəsinə (MONEYVAL) İqtisadi Əməkdaşlıq və İnkişaf Təşkilatının Maliyyə Tədbirləri üzrə İşçi Qrupunun standartları (FATF) üzrə Litvanın qiymətləndirilməsi zamanı qiymətləndirici ölkə qismində daxil olacaq. Trend-in məlumatına görə, bu barədə cümə axşamı ölkənin Mərkəzi Bankı yanında Maliyyə Monitorinqi Xidmətinin rəhbəri Adışirin Qasımov deyib.
"MONEYVAL-ın müəyyən etdiyi prosedurlara əsasən, qiymətləndirmədə dörd ölkə iştirak edəcək. Onlardan biri Azərbaycan olacaq", - o qeyd edib.
Azərbaycanın cinayət yolu ilə əldə edilmiş pul vəsaitlərinin və terrorçuluğun maliyyələşdirilməsinə qarşı mübarizə sahəsində gördüyü tədbirlər 2010-cu ilin iyununda FATF-ın növbəti plenar iclası zamanı yüksək qiymətləndirilib. Bunun nəticəsində oktyabrda Azərbaycan FATF-ın siyahısından çıxarılıb.
Azərbaycan qiymətləndirici ölkə qismində ilk dəfə ötən il çıxış edib. Ölkə tərəfindən Moldovanın cinayət yolu ilə əldə edilmiş pul vəsaitlərinin və terrorçuluğun maliyyələşdirilməsinə qarşı mübarizə sahəsi üzrə ikinci irəliləyişi ilə bağlı hesabatı təhlil edilib və Azərbaycan tərəfi MONEYVAL-ın katibliyi ilə birlikdə dekabrın 7-10-da komitənin 34-cü plenar iclasında rəylə çıxış edib. Azərbaycanın rəyi MONEYVAL katibliyi tərəfindən qənaətbəxş qarşılanıb.
İqtisadi Əməkdaşlıq və İnkişaf Təşkilatının Maliyyə Tədbirləri üzrə İşçi Qrupu (FATF) cinayət gəlirlərinin "əldə edilməsi" və terrorizmin maliyyələşməsi ilə mübarizədə kollektiv tədbirlərin hazırlanması və həyata keçirilməsi üçün yaradılan hökumətlərarası təşkilatdır. FATF 1989-cu ildə Parisdə keçirilən "Böyük səkkizlik" sammitinin qərarına uyğun olaraq yaradılıb. Hazırda FATF-a 34 iştirakçı daxildir. FATF 1990-cı ildə pul vəsaitlərinin yuyulması ilə mübarizə aparmaq üçün 40 tövsiyə hazırlayıb. 1996 və 2003-cü illərdə pulların silinməsi texnologiyasının inkişaf etməsi ilə əlaqədar onlara yenidən baxılıb.
Bundan başqa, FATF 2001-ci ildə terrorizmin maliyyələşdirilməsi ilə mübarizədə doqquz xüsusi tövsiyə də hazırlayıb. O, 2004-cü ilin oktyabrında dünyada dəyişmiş siyasi vəziyyətə uyğunlaşdırılıb. Bu sənədlər pulların yuyulması və terrorizmin maliyyələşməsinin qarşısının alınması üzrə beynəlxalq standartlar kimi qəbul edilib.
