Azərbaycan, Bakı, 23 fevral /Trend, müxbir N.İsmayılova/
Azərbaycan bankı "Gəncə Bank" Bakı şöbəsinin filiala çevrilməsi üzrə planlarını təxirə salıb. Bu barədə çərşənbə günü bankdan deyiblər.
"Bank daxili proseslər və öz siyasətinə yenidən baxması səbəbindən Bakı şöbəsinin yenidən təşkili üzrə planlarını təxirə salıb. Gələcəkdə bank rəhbərliyinin bu məsələyə yenidən qayıdacağı mümkündür", - bankdan bildiriblər.
Hazırda şöbədə pul köçürmələri və hesabların açılması kimi xidmətlər göstərilir, lakin kreditlərin verilməsi hələ ki mümkün deyil.
Bankdan dediklərinə görə, bu il ərzində bank Tovuz şəhərində yeni filial açmağı planlaşdırır.
"Gəncə Bank" 1994-cü ildən fəaliyyət göstərir. Baş ofis Gəncə şəhərində yerləşir. Bankın nizamnamə kapitalı 15 milyon manat təşkil edir. Bu gün Gəncə (2), Şəmkir və Bərdədə bankın 4 filialı fəaliyyət göstərir.
Fevralın 23-nə olan rəsmi məzənnə 0,7943 AZN/USD təşkil edir.
