Azərbaycan, Bakı, 24 fevral /Trend, müxbir Ü.İsmayılova/
Azərbaycanın ən iri polad istehsalçısı olan "Baku Steel Company"nin gücü ildə 350 min ton məhsul təşkil edir. Bu barədə şirkətin baş direktoru Süleyman Məmmədovun rəsmi mətbuatda dərc olunmuş müsahibəsində deyilir.
"Belə göstəricini zavodun avadanlıqlarının yenidən qurulması, eləcə də daha güclü elektrik transformatorunun quraşdırılması nəticəsində əldə etmək mümkün olub", - Məmmədov deyib.
Onun sözlərinə görə, bu gün şirkət daxili bazarı keyfiyyətli armaturlarla təmin edir. Zavodun əməkdaşlarının sayı 1800 nəfərdir.
Baş direktorun sözlərinə görə, bazarda "Baku Steel Company" şirkətinin məhsullarına ciddi tələb var, bununla əlaqədar şirkətin heyəti istehsal olunan məhsulun keyfiyyətinə ciddi nəzarət edir. Zavodun məhsullarının keyfiyyətinin yoxlanmasına respublika ərazisinadə fəaliyyət göstərən institut və laboratoriyalar da cəlb olunub.
"Həm daxili, həm də xarici bazardakı tələbi nəzərə alaraq, "Baku Steel Company" 2011-ci ildə istehsal olunan məhsullarının çeşidini artırmaq fikrindədir", - Məmmədov bildirib.
Onun sözlərinə görə, yaxın vaxtlarda zavod günyə, şveller, diyircək, məftil istehsal edəcək, metal məmulatların istehsalına başlayacaq. Zavod artıq yeni məhsulların istehsalına başlamaq üçün müvafiq avadanlıqlar alıb.