Azərbaycan, Bakı, 15 mart /Trend, müxbir N.İsmayılova/
Azərbaycanda 2010-cu ildə 5,7 faizə çatan istehlak qiymətlərinin indeksi 2012-2013-cü illərdə beş faizədək azalacaq. Bu barədə "Standard&Рoor's" beynəlxalq reytinq agentliyinin hesabatında deyilir.
"Azərbaycan Mərkəzi Bankı (AMB) banklara və şirkətlərə likvidlik verərək maliyyə sabitliyini qoruyub saxlaya bilib. Lakin neftin qiymətlərinin yüksəlməsi və daxili tələbatın artımını nəzərə alaraq, güman edirik ki, 2010-cu ildən sonra inflyasiyanın səviyyəsinin azalması asta olacaq: 2011-ci ildə inflyasiya altı faiz, 2012-2013-cü illərdə isə beş faiz təşkil edəcək", - hesabatda deyilir.
Agentliyin qiymətləndirmələrinə görə, Azərbaycanda ÜDM-in artım tempi təqribən "ВВ" və "ВВВ" reytinqli ölkələrin (2010-cu ildə müvafiq olaraq ÜDM-in 3,9 və 3,8 faizini təşkil edən) orta göstəricilərinə uyğundur.
"Biz 2011-ci ildə Azərbaycanda adambaşına düşən ÜDM göstəricisinin 6 260 dollaradək artacağını, daha doğrusu "ВВ" reytinqli ölkələrin orta göstəricisinə uyğun (6 160 dollar) olacağını gözləyirik", - hesabatda deyilir.
Bu göstərici üzrə Azərbaycan investisiya kateqoriyası reytinqinə malik Mərakeş və Peru ilə təxminən bir səviyyədədir. Bundan başqa, Azərbaycan adambaşına ÜDM-in artım tempi üzrə "ВВ" və "ВВВ" reytinq katerqoriyasına malik digər ölkələri qabaqlayır.
Azərbaycan iqtisadiyyatının xarakterik xüsusiyyətləri neft və qaz ehtiyatları ilə əhəmiyyətli təmin olunması və əhalinin adambaşına gəlirlərinin nisbətən aşağı, lakin sürətlə artan səviyyəsidir. 2010-ci ildə neft-qaz sektorunun ÜDM-də töhfəsi 50 faiz (2003-cü ildəki 30 faizə qarşı) təşkil edir. Onun dövlət büdcəsinin gəlirlərinin 60 faizə yaxınını (Neft Fondundan daxilolmalar nəzərə alınmaqla) və mal ixracının təxminən 95 faizini təmin edəcəyi gözlənilir.