Azərbaycan, Bakı, 25 aprel /Trend, müxbir A.Axundov/
İlin birinci rübündə Azərbaycan 2,52 milyon dollar məbləğində tütün və tütün məmulatları ixrac edib. Bu, ötən ilin analoji dövr göstəricisini 2,35 dəfə ötür və ixracın ümumu həcminin 0,05 faizini təşkil edir. Bu barədə bazar ertəsi Dövlət Gömrük Komitəsindən məlumat verilib.
Məlumata əsasən, ilk üç ayda Azərbaycanın ixracının çox hissəsi - 86,35 faizi xam neft ixracının payına düşüb. Yanvar-martda 4,702 milyard dollar məbləğində xam neft ixrac olunub. Bu, ötən ilin analoji dövr göstəricisini 23,24 faiz ötür.
Hesabat dövrü ərzində 270,724 milyon dollar məbləğində (il ərzində 10,62 faiz azalma) neft məhsulları ixrac edilib. Bu, ölkənin ümumi ixracının 4,97 faizini təşkil edir.
Bundan başqa, 18,426 milyon dollar məbləğində kimya məhsulları (29,66 faiz artım, ümumi ixracda payı 0,34 faiz), 3,564 milyon dollarlıq toxumlardan təmizlənmiş pambıq (60,87 faiz artım, ümumi ixracda payı 0,07 faiz), 37,618 milyon dollar məbləğdə qara metal və ondan hazırlanan məmulatlar (37,62 faiz artım, ümumi ixracda payı 0,69 faiz), 1,215 milyon dollar məbləğində alümin və ondan hazırlanan məmulatlar (24,69 faiz artım, ümumi ixracda payı 0,02 faiz), 20,2 milyon dollar məbləğində meyvə və tərəvəz (36,02 faiz artım, ümumi ixracda payı 0,37 faiz), 2,54 milyon dollar məbləğində alkoqol və alkoqolsuz içkilər (43,8 faiz azalma, ümumi ixracda payı 0,05 faiz), 51,422 milyon dollar məbləğində bitki yağları və heyvan yağları (7,39 faiz azalma, ümumi ixracda payı 0,94 faiz).
Yanvar-mart ərzində Azərbaycanın ixrac əməliyyatları 5,445 milyard dollar təşkil edib. Bu, 2010-cu ilin analoji dövr göstəricisi ilə müqayisədə 23,97 faiz çoxdur. İdxal 1,892 milyad dollar təşkil edib. Bu, 2010-cu ilin analoji dövrü ilə müqayisədə 63,1 fazi çoxdur.
Bu müddət ərzində ölkənin mal dövriyyəsinin ümumi həcmi 7,336 milyard dollar təşkil edib. Bu, ötən ilin analoji dövr göstəricisini 32,15 faiz ötür.
Xarici ticarət əməliyyatlarında 3,553 milyard dollar məbləğində müsbət saldo yaranıb.