Azərbaycan, Bakı, 11 may /Trend, müxbir N.İsmayılova/
"Azal Sığorta" şirkəti ölkənin Mərkəzi Bankı yanında fəaliyyət göstərən Azərbaycan İpoteka Fondunun müvəkkil agenti olub. Bu barədə çərşənbə günü Fonddan bildirilib.
Nəticədə AİF-in sığorta agentlərinin sayı 19-a çatıb.
Hava nəqliyyatının sığortasında ixtisaslaşan "Azal Sığorta" şirkəti sığortanın digər növləri üzrə də xidmət göstərir. 1995-ci ildə yaradılan şirkətin təsisçisi "Azal" QSC-dir.
Şirkətin nizamnamə kapitalı 8,855 milyon manat təşkil edir. Cari ilin yanvar-mart ayları ərzində sığorta haqları 3,29 milyon manat, ödənişlər 2,76 milyon manat təşkil edib.
Azərbaycan İpoteka Fondu 2005-ci ilin sentyabrında Azərbaycan Prezidentinin fərmanı ilə dövlət təşkilatı qismində yaradılıb. Onun nizamnaməsi Prezidentin ayrıca fərmanı ilə 2005-ci ilin dekabrında təsdiq edilib. AİF-in əsas məqsədi Azərbaycan vətəndaşlarının uzunmüddətli maliyyələşdirmə vasitəsilə mənzillərlə təmin edilməsi üçün maliyyələşmə mexanizmlərinin yaradılmasından, eləcə də ipoteka kreditləşməsinə daxili və xarici investisiyaların cəlb edilməsindən ibarətdir.
Hazırda İpoteka Fondunun müvəkkil agentləri qismində 22 bank, 19 sığorta şirkəti və 12 qiymətləndirmə təşkilatı çıxış edir.
Mayın 11-nə olan rəsmi məzənnə 0,7911 AZN/USD təşkil edir.
