Azərbaycan, Bakı, 11 may /Trend, müxbir İ.Xəlilova/
İslam İnkişaf Bankının İcraçı Direktorlar Şurası Naxçıvanda daşqınların qarşısının alınması, becərilən ərazilərin modernləşdirilməsi və genişləndirilməsi layihəsinin həyata keçirilməsi üçün 64,83 milyon dollar dəyərində maliyyələşdirməni bəyənib. Bu barədə bankın məlumatında deyilir.
Trend-ə ölkə hökumətindən dediklərinə görə, 4 il üçün nəzərdə tutulan layihənin ümumi dəyəri 80 milyon dollara yaxındır.
İİB-in krediti iki hissədən ibarətdir: 9,5 milyon dollar güzəştli şərtlərlə 19 il müddətinə 4 ili güzəştli olmaqla və 2,6 faiz dərəcəsi ilə veriləcək, 55,33 milyon dollar isə qeyri-kommersiya şərtlərində 14 il müddətinə 4 ili güzəştli olmaqla və "swop rate" faiz dərəcəsi ilə ayrılacaq.
Layihə çərçivəsində Araz çayı yaxınlığında sahilbərkitmə qurğularının tikintisi, təkrar kanalların tikintisi və digər tədbirlər nəzərdə tutulub.
Ötən il yayın əvvəlində fasiləsiz yağışların yağması nəticəsində Kür, Araz və digər çayların daşması ilə əlaqədar Azərbaycanın 40 rayonunun ərazisində güclü daşqın olub. Təbii fəlakət nəticəsində 20 minə yaxın ev su altında qalıb, 300-dən çox ev tamamilə dağılıb, iki mini isə qəzalı vəziyyətə düşüb, 50 mindən çox əkin sahələrini su basıb.
Ekologiya və Təbii Sərvətlər Nazirliyinin Milli Hidrometeorologiya Departamenti çay axınlarının formalaşdığı yüksək dağlıq yerlərdə qarın qalınlığının ölçülməsi ilə bağlı tədqiqat aparıb. Bu işlər Böyük Qafqaz, Kiçik Qafqaz dağlarında yeddi, Naxçıvan Muxtar Respublikasında isə beş marşrut üzrə həyata keçirilib. Ekspedisiya işləri nəticəsində aydın olub ki, dağ çaylarının hövzəsində qar şəklində olan su ehtiyatları çoxillik normanı, eləcə də 2010-cu ildə qeydə alınan normanı ötür. Belə ki, Naxçıvan MRdə çayların hövzəsində norma 67,1 mm-ə bərabərdir, hazırda isə 103 mm-dir.
